Vairengte leh a chhehvel khuaa hmunphiah chingtute harsatna chu Congress Thalai-in an enfiah a, sawrkar leh RR Associates inrawlh vanga buaina chuan nghawng a nei thui dawn tih sawiin, ZPM sawrkar chu inthlan hma leh hnua a intiam angin leisak emaw zangnadawmna emaw turin an phut tih an sawi.
Congress Thalai president Laltawnliana hmunphiah chin chu Congress sawrkar laia NLUP atanga bul tan niin, kum tin a man a san chhoh zel lai a, kumina sawrkarin hmunphiah man nasa taka a tichhe ta mai chu inrawkna nasa tak a ni tih a sawi. Hmunphiah man to lai leh hlawk lai ber hun Febuary-a a hralhna chungchanga buai a, che thei loa an awm chu pawi a tih thu sawiin, ZPM sawrkar chu kuthnathawktute khaichhuaktu niloin kuthnathawktute tana mangchhia an ni tih a sawi.
Sawrkarin RR Associates inremna a siampui avangin kum danga hmunphiah latu dangte inrawlh a rem loa, sawrkarin a hralhna rate a siam leh si avangin RR Associates hian chhuanlam siamin an inthiarfihlim san a, tunah loh theih lohin kg ah Rs. 13-15 in hmunphiah an sah tir a, a hun taka lak a tul si avangin pawisa nei lo chungin a hralh hun atana pek turin hlawhfa nen hmunphiah an sat tih a sawi a ni.
Hetianga hmunphiah chingtute an buai lai hian chief minister berin, he thilah hian sawrkarin thiam loh a nei loa, agent-te thiam loh a ni, kan tuar tlang a ni ber, tia a sawi chu mawhphurhna la ngam lo a nih zia a lantir tih Congress Thalai president hian sawiin, “Hmunphiah chingtute hian a hralh theih loh chhan niloin, an hralh theih dan tur, a solution hi a ni an hriat duha an mamawh. Kan tuar tlang, tih hi tuna chief minister, minister leh MLA te, inthlan dawna an affidavit thehluhah pawh hausa tak takte leh hmunphiah chingtu mi harsate tawrhna hi huang khata dah chi a ni loa, inpalzutna a ni,” a ti.
Chief minister chu hmanni lawka hmunphiah chungchang a sawinaah an lei tur thu a sawi bakah a hnu lawkah a leina tur cheng vaibelchhe 110 an dah fel vek tawh tih sawiah puhin, “RR Associates hian fin kherek chhuahin lei lo mah se, hmunphiah chingtute thar chhuah hi sawrkar hian a ranglama leisak thuai turin kan phut a ni,” a ti.
Congress Thalai senior vice president Ngurdingpuia chuan February 21-a Assembly Session-ah chief minister-in hmunphiah hring lei tum Vai lokal turte lo dang a, vau pawl an awm tih a sawi chungchangah, “RR Associates hian sawrkarin hmunphiah hralhna rate a siam avanga chhuanlam siamin kuthnathawktuten hralh lo thei lo dinhmunah an din huna an mangan lai chuha lei tumin an inthiarfihlim zawk a ni,” a ti. Sawrkar chu hmunphiah chingtute compensate ngei tura phutiin, “Intiama inzuar an ni a, felfai takin an intiamna chu an kalpui tur a ni. Kuthnathawktute tana an intiam avanga mipuiin theihtawpa hna thawk leh anmahni vote tam tak an awm a ni,” a ti.
Hmunphiaha harsatna enfiah Intiamna hlen turin sawrkar phut
