Sawrkar laipuiin hmasawnna hna thawhna atana state-te a puktir SASCI (Special Assistance to States for Capital Investment) chu MNF sawrkarin a hna hmuh tur awm si loin a hmang nasa tih ZPM Thalai chuan an sawi a. Tunhnaia PWD hnuaiah hna engemawzat pekchhuah leh chu an vil zui dawn tih an sawi.
ZPM Thalai hruaitute sawi danin, tunhnaiah August 29 khan restricted tender hmangin PWD hnuaiah SASCI hna 25, cheng vbch 82.7 man pawm a ni a, September 5 khan PWD hnuaiah vek, restricted tender hmangin hna 4, vbch 11.56 pawmin, September 8 khan PWD hnuaiah vek hna 77, vbch 296.41 man pawm lehin, a vaiin hna 106, cheng vbch 390.67 a ni tih an sawi.
State hmasawnna aiin election code of conduct-in a phuar hmaa SASCI sum hman a nih theihna turin beihpui an thlak nia a lan thu sawiin, inthlan puan hnan a nih pawha ‘hna kal lai’ anga a kal theih nan a hminga hna tan hman tum nia an hmuh thu an sawi.
“SASCI hi hmasawnna ruhrel tha leh rotling siamna atan leh, nakina sum siamchhuak thei tur hmasawnna din a nihna tura sawrkar laipuiin a ruahman a nih laiin, duhsak zawng sum insiamna leh vote zawnna ang hrimin MNF sawrkar hian a hmang,” a ti.
SASCI sum hmanga hnathawh zingah hnathawh chhe tak te, a then phei chu an thawhna hmun nia sawiah kut thlakna engmah a awm lo tih ZPM Thalai hruaitute hian an sawi a. Lok Ayukta-a bawhzui lai mekte pawh awmin, SASCI sum hmanna hi an chhuzuiin an vil zel dawn tih an sawi a ni.
Hna hmuh tur awm si loin MNF-in SASCI hmang nasa – ZPM Thalai
