Tun sawrkara hna lak dana kalphung thar hman chu nakin zelah mi taima leh tumruh, a thiam leh phute chauhin hlawhtlinna an chan theih nana kawng sial lawkna a ni tih minister Dr Vanlalthlana chuan a sawi.
Thawhlehnia Lawngtlaia zirna in hrang hrang tlawha thawktute nen an inkawmnaah School Education minister Dr Vanlalthlana chuan dik lo taka thil tihna chuan rilru dawizepna a thlen phah thin a, zirlai nih lai atanga dikna tan tlat ngam chu an puitlin thlengin mi huaisen leh rintlak an ni thin tih a sawi.
Sawrkar hnuaia hna laknaah a thiam leh phu te chuah lak an nih tur thu sawiin, “Samagra Shiksha hnuaia mi 161 lak turah pawh written exam bakah an thiamna a taka an hman chhuah thiam leh thiam loh endik nan ‘demo-teaching’ neih tum a ni a. Khawi hmun atang pawhin duhsakna lantir tura lehkha ziak a awm a nih pawhin awmzia a awm loang,” a ti.
Zirna in tichangtlung tura mahni remchan dana mimal leh pawl anga luanchhuahna tur, sawrkar laipuiin Vidhyanjali a duan chu, inziaklut tur leh hemi kawnga tlem tal pawha tha thawhtu ni theuh turin minister hian a sawm a ni.
Hna lak dan thar hi a thiam leh phu tana kawng sialna – Dr Vanlalthlana
