MCS (Combined) Examination 2023 ah dik lo taka duhsak zawngte tih tlin anga sawi leh thuthang awm mekah Mizoram Public Service Commission hotute chuan dan dik loa tih tlin an awm loa, an lak dan a rintlak tawh tih an sawi.Thuthar thehdarhtute nen an inkawmnaah MPSC secretary Vanlalmawia chuan, an chungchanga thuthang mek chuan anmahni kaltlanga exam beitute rilru ah leh mipuiah boruak tha lo leh hlauhthawnna a thlen palh theih avangin, tunhmaa an lo chin vak loh, exam an kalpui dan chu mipui hriata sawi a ngai tih a sawi.
Kum 1991-a MPSC din atangin MPSC exam kalpui danah sawiselna liantham a awm hriat a ni ngai loa, a chhan chu, MPSC-in hna lakna (recruitment) a kalpuiah dik leh fel taka a kalpui thin vang a ni tih a sawi a. Direct recruitment a kalpuiah, written exam zawhna chhanna en dan (evaluation) phung fel tak neiin, chhawng thumin – first evaluator leh second evaluator ten inhre pawh tawn miah loa mark an pek chu third evaluator (scrutinizer) in a lo enkawp a, chumi atang chuan final mark siam a ni tih a sawi.
“MPSC office-in result a siamna turah scrutinizer-ten final mark an siam hi uluk taka check hnu ah tabulation tih thin a ni a. MPSC-in mark hi belh emaw paih emaw a nei ngai loa, hetiang hi MPSC-in exam a kalpui thin dan a ni a, kalpui mek zel pawh a ni,” a ti.
MPSC controller of examination Zosangzuali Pachuau chuan evaluation kalpui dan hi a paper entirin a sawifiah a. MCS exam a ni emaw, exam dang an kalpui reng rengah pawh written exam-a evaluator-ten mark/ remarks an peknaah ziah ran ho nawhreh an neih chang a awm a, evaluator dawt lehte kut a thlen hmaa tih thin niin, kalphungah an lo neih tawh a nih vangin rinhlelhawm lam zawngin an lo ngai ngai loa, tun tuma result-a lungawilote hnenah pawh ngaihngam takin RTI-a an dil angin an pechhuak mai tih a sawi a ni.
Scrutinzer-in a endik hnu ah MPSC Confidential Section-ah a lut a, thawktuten an lo endik nawn leh vek a, final marks hi personal ointerview neitu chairman leh member dangte hnen a thleng ngai lo hrim hrim zawk tih a sawi a. Interview an neih zawh vek hnu ah chauh written marks hi an va pe a, chumi atang chuan belhkhawm a ni chauh tih a sawi a ni.
MPSC written mark endik dan:
8 Answer sheet hi first evaluator hnenah endik tura pek hmasak ber a ni a. A check hnu ah tabulation sheet-ah a mark pek a chhinchhiah a, MPSC hnenah a thehlut. Evaluator-te hi answer sheet chhungah mark pe lo tura hrilh an ni a; mark pekna tur table-ah chauh dah tura tih an nih laiin, exam kalphung dangah asnwer sheet-a mark pek hi tih than a nih avangin, evaluator thenkhat ten answer sheet-ah mark an lo pe palh fo thin. Second evaluator-a pek a nih hma in chutianga mark pek chu thaichhiat (hnawih var) thin a ni a. Hei hi second evaluator-in first evaluator mark pek hre miah loa evaluation a kalpui theih nana ruahman a ni.
8 First evaluator-in mark a pekna table pawhthlak (lak thlak) a nih hnu ah second evaluator hnenah answer sheet hi pek leh a ni a. First evaluator-in mark a pek zat hre miah loa second evaluator-in independent evaluation a kalpui theihnan hetiang hi ruahman a ni. Second evaluator-in mark a pek chu tabulation sheet-ah dahfelin MPSC-a thehluh thin a ni.
8 Evaluation stage-I leh II zawh a nih hnu ah scrutinizer hnena pek a ni a. Scrutinizer hian first evaluator leh second evaluator mark pekte enin, siamthat ngai leh tih dik ngaite siamtha in, scrutinizer-in final marks a siam thin a ni.
8 MPSC-in exam a kalpuina atan expert tam tak a mamawh a. Chu’ngte chu – question setter, moderator, first evaluator, second evaluator leh scrutinizer an ni. MCS (Combined) Exam 2023 ah khan expert hrang hrang 213 ruat an ni.
Hna lak danah dik lo a awm lo – MPSC
