Sawrkar hnathawk zingah hna thawk thei lo leh thawk tlak lo an indapchhuak anga, a tul angin dan anga insingsak an tum tih chief minister Lalduhoma chuan a sawi.Zirtawpnia Mizoram Secretariat Service Association-in conference vawi 19-na an neih a hmanpuinaah chief minister chuan kalphung tha zawk duha au thin an nih ang ngeiin, an sawrkarin mipui tana rawngbawlna tha lehzual siam tumin hma a la ta nual a. Hengah hian sawrkar hnathawkten tha taka an thawhpui an beisei tih a sawi.
“Hnathawktu tha kan neih theihnan department tinah Service Review Committee kan din a. Hna thawk thei lo emaw thawk tlak emaw lo dap chhuak a, a tul anga dan anga insingsak kan tum. Sawrkar hnathawkte service quality a that hian kan ram quality a tha dawn a ni,” a ti.
Pawl leh kohhran lamah sawrkar hnathawkte an inhman nasat lutuk hian kan nitin hna in a tuar ve thei tih Lalduhoma hian a sawi a. Inhman dan tawk thiam a tha, tiin, “Thawhpuite kep ngai reng, mahni thawhna hmuna hmuh harsa tak kan ni ang tih a hlauhawm. Kan hna hi kan rawngbawlna atana Pathian min hunna a ni a, kan ngaipawimawh ber tur a ni,” a ti.
Reilote sawrkarna an chelh chhungin service association ho a hmu kim deuh vek tawh a. An inkarah inelrelna – service rivalry a nasa hle tih a hmu tih sawiin, “Hei hi tihdal ka duh. Thawkho vek kan ni a, kan hna in a tuar ang tih ka hlau thin. Tuihnar pakhat ring za vek kan ni a, in chanvo hi a awm zel dawn tih hre tlang ang u,” chief minister hian a ti.
An hnuaia thawkte welfare an ngaituah tawk lo thin nia a hriat thu leh a hnuai lamte hmathatna ngaihthah turin a chah a. Post ruak hnawhkhah kawngah pawh a hnuailam a kawrawng lutuk nia an hria thu sawiin, nakin zelah harsatna a siam thei tih a sawi a ni.
Chief minister chuan MSSA chu sawrkar hnathawktu pawimawh tak, department tina inzarhpharh an ni a. Sawrkar inenkawlna dan lam pawh an hre tlang a, ram rawngbawlna tangkai tak thawktute an ni tih a sawi.
Mizoram Secretariat Service Association hi kum 2004-a ding a ni a, Mizoram Ministerial Service atanga group A chin unit hrang anga kalta an ni. MSSA hian tunah sanctioned post 260 neiin, officer member 261 an awm mek.
Hna thawk tlak lo kan dapchhuak dawn – Chief minister
