Hna thawk turin state pawna
chhuah hreh lo turin thalai fuih
Hna eng chi pawh nise, thawk turin state pawna chhuak hreh lo turin larsap chuan Mizo thalaite a chah.
Mizoram larsap Dr Hari Babu Kambhampati hian Mizoram Youth Commission (MYC) chairman Malsawmzuala Ralte chu Thawhtanni khan Raj Bhavan-ah kawmin MYC hmalakna leh hmachhawp a sawipui.
India ram hmun hrang hranga hnathawh tur remchang tam tak awmte Mizo thalaiten an hmuh theihnan chak zawka hma lak a tul tih larsap hian sawiin, zirna sang bel lo, thingtlang kilkhawr zawka awmte thlengin an kumin a phak phawt chuan hna an hmuh theihnan puih a tul tih a sawi.
Qualification leh an tuina azir zela thalai hna zawngte register-a data mumal tak neih hmasak a tul thu leh, hna a awm veleha an zawm theihnan lo inhmakhua lawk a tul thu sawiin, Mizo thalaite chu mahni awmhmun chhuahsan hreh lo tur leh hmun danga hna zawnga chhuah tum turin a chah. Puih a tul huna pui turin a inhuam reng tih a hrilh a ni.
MYC chairman chuan 2024-2025 sawrkar kum kal meka an hmalakna hrilhin, thalai 43-in MYC kaltlanga hna an hmu tawh. Thalaite hmakhua ngaia larsap-in state danga hnathawh tur a ngaihtuah sak thin leh tunhnaiah larsap hmalaknaa Sri City Andra Pradesh-ah Mizo thalai 8-in hna thar an hmuh avangin lawmthu a sawi a; MYC hmalakna a ngaihven reng thin avangin lawmthu a hrilh a ni.
Hna thawk turin state pawna chhuah hreh lo turin thalai fuih
