Lok Sabha inthlanpui neih zawh taka vote tla a tam theih nana Systematic Voters’ Education & Electoral Literacy (SVEEP) team, District Election Office Hnahthialin South Tuipui bial booth level officer (BLO) te puala a buatsaih, vote tlak that berna polling station (best voter turnout) leh 2019 Lok Sabha inthlan vote tla atanga kumin inthlana vote tla pun tam berna polling station (best increase in voter turnout % in comparison to 2019 MP election) a tithate hnenah Ningani khan lawmman hlan a ni.
District election officer Hnahthial Chuauhnuna chuan MP inthlanah Mizoram pum ang zawngin vote a tla tha ngai loa, South Tuipui bialah pawh thawktuten theihtawp an chhuah chungin kumin inthlanah state average aiin a tla tlem tih a sawi.
DEO bakah addl DC Zothanmawia Khiangte ten lawmman an sem a. SVEEP nodal officer, DIPRO K Ngosai chuan kumin MP inthlanpuia South Tuipui biala vote tlak dan report pe in, vote nei mi 16223 awmah vote 9088 a tla a, za zelah 56.02 a ni.
BLO-te chuan an khua theuha hma an lak dan tlangpui an sawi a. Voter slip an semchhuah chuan vote thlak turte tan a awlsam phah hle tih an sawi. Vote tla a that theih nan in tinah campaign an nei thin a, aurinna nen mitin vote thlak turin an sawm thin bawk.
SVEEP puala intihsiakna hi category hniha then a ni a. Best voter turn-out-ah 1-na Lungpuitlang BLO VL Roluahpuia Hauhulh (88.24%), 2-na New Kawnpui BLO H Lalhlimpuia (85.71%), 3-na Denlung BLO F Vanlalruata (83.02%)
Best increase in voter turnout-ah 1-na Lungpuitlang BLO VL Rohluahluia Hauhulh (Lungpuitlang PS ah hian 2019 inthlanah 83.69 % vote tla in kuminah 88.24% a tla a, 4.55 in a pung); 2-na Tarpho BLO C Rohmingliana (Tarpho PS ah hian 2019 inthlanah 74.48% vote tla in kumin inthlanah 77.11% a tla a, 2.63 in a pung), 3-na Muallianpui BLO LS Lalzuitluanga (Muallianpui PS ah 2019 inthlanah 62.69% vote tla in kumin inthlahah 63.58% a tla a, 1.75 in a pung).
Pakhatna hian sumfai Rs. 5000, pahnihna Rs. 4000, pathumna Rs. 3000 a keng a, citation an dawng theuh bawk.
Hnahthial district-ah vote tlak thatna BLO-te lawmman hlan
