Hnahthialah HS leh HSS zirlaite
ruihhlo hlauhawm zia an hrilhfiah
Excise & Narcotics Station Hnahthial District chuan Hnahthiala high school leh higher secondary school zirlaite hnenah ruihhlo ti lo tura inzirtirna Ningani khan a buatsaih.
Resource person-ah ruihhlo ngai enkawllna Jehova Jire Camping Centre neitu, Sub Hqrs YMA Hnahthial president Hmingthanzuala hman a ni a. Zirlaite hnenah hian Home a enkawlnaa a tawnhriat atanga thil lang chiang ber chu, tihchhin pawi zia a ni tih a hrilh. “Ngawlvei kan tihte hian sim duh viau thin mah se, vawikhat an tih chhin tawhna khan ngawlveiah siamin an sim theih tawh loh phah thin,” a ti.
Thalai, zirlai rual chu fimkhur lehzual tura chahin, an ni ang rual, taksa chak lai tak hian tih ve chhin chakna a hluar thin hle tih a sawi a. Chuvang tak chuan tam tak chu high school leh higher secondary school kal rual an nih atangin ruihhlo an ti chho tan thin tih a sawi a ni.
Mizorama ruihhlo hluar ber zing ami heroin chu rim a neih ve loh avang leh a thawh dan pawnlamah a lan chhuah nghal mai loh avangin mi tam takin a rukin an ti thin tih Hmingthanzuala hian a sawi a. Central YMA tarlan danin, Hnahthial district chu khawchhak lam atanga heroin chawkluhna kalkawng lian ber a ni, tiin, zirlaite chu vawikhat pawh ti ve chhin miah lo tura an fimkhur lehzual a tul tih a sawi a ni.
Resource person hian powerpoint presentation hmangin ruihhloin mi a nghawng dan zirlaite chu entirin, an nih tum ang nih tir thei lotu ruihhlo chu ti ve chhin miah lo turin a chah a. Programme neih zawh hian zirlaite hian hming ziahhnanin ruihhlo ti ve chhin lo turin an intiam a ni.
Hnahthialah HS leh HSS zirlaite ruihhlo hlauhawm zia an hrilhfiah
