Central Co-Ordination Committee Vawi 105-na thurel ‘YMA khawih’ nambar 2-na chu, ‘Mizoram chhunga hnam dang sumdawng tam ta lutuk hi ti tlem turin YMA-in hma la rawh se’ tih a ni a. Hemi chungchangah hian nasa zawka hmalakna kalpui ni se, inzirtirna thuziak tar leh semchhuahna kawnga hmalak ni se, tih a ni bawk.
‘Hnam dang sumdawng’ han tih tawp mai hian a huam zau hle. Hnam dang zingah pawh phalna nei leh phalna nei lo an awm ang a, phalna nei lova hnam dang sumdawngte chuan dan an bawhchhia a, action lak theih a ni.
Chutih laiin phalna neia hnam dang sumdawng pawh an awm a, YMA-in a ngaimawh tak bera chu – “Hnam dangte hi sumdawn phalna kan pek tam lutuk chuan, keimahni a ram leilung fate harsatna a siam dawn a, chuvangin hetianga hnam dang sumdawng tam lutuk tur hi kan hrek deuh a ngai tawh a ni” tih a nih a rinawm.
Hei hi YMA thuneihna piah lam a nih tawh avangin, YMA chuan thuneitute an thuhneh (convince) a pawimawh dawn ta tihna a ni.
Hetiang thil hi tun hnai maia rawn hluar thar ta a ni mai lo. Rel kawng a lo luh thuk deuh tak avanga hnam dang sumdawngte hi rawn pung chho ta hluai pawh an ni hran lo. Kum sawm vel kal taah khan MZP lam chuan hnam dang sumdawngte hi an lo buaipui fê tawh mai a. Khatih laia MZP hruaitu pakhat chuan, “Mizorama hnam dang sumdawng 90% vel hi dan lova sumdawng an ni…” tiin a lo sawi chhuak tawh nghe nghe a. “….sawrkarin hnawtchhuak se kan duh a, mahse an hnawtchhuak si lova, Mizoramah dan lova sumdawng an nih avangin ti ve deuh thin se kan duh a. Dan lova sumdawng an nih avangin an hnenah hian pawisa kan khâwn thin a, kan zêp lo, phat thu pawh a awm lo. Mi thenkhat chuan min dem tih pawh kan hria, min lo dem mai teh u, kan khawn zel dâwn, hengho hnên atanga kan pawisa lakte hi ram leh hnam rawngbawl nan hman a ni…. MZP-in kan duh ber zâwk chu, Mizoramah hian pawisa khawnna tur hnam dang hi awm lo se tih hi a ni….” tiin a sawi zui bawk.
Hetiang vel hi tunhma kum sawm vel kaltaa kan dinhmun a lo ni daih tawh a, dan lova hnam dang sumdawng heti zat an awm a nih chuan, thil chiang sa chu, ‘dan lova sumdawng na na na chu, dan angin action lak mai tur’ tih hi a ni.
Hnam dang sumdawng….
