MZP rorelna sâng Federal Council thutkhawmnaah MZP President chuan Mizo hming hawha hnam dang sumdawng Mizoram chhungah an tam tih a sawi a. Hnamdang mistiri ten an duh duh dana rate an inchhiar leh, contractor ang maia contract system-a thil an kalpui chu MZP chuan kan ngaimawh hle, a ti bawk.
Mizo hming hawha hnam dang sumdawng tihtawp tuma buaipuina hi a rei tawh a, mahse tihtawp chu sawi loh, a pung tual tual zawk niin a lang. Hetiang renga kan kal chuan engtikah emaw chuan Mizo dawr hi ‘a awm ve pheuh pheuh’ tih hun a la thleng mai ang tih a hlauhawm a ni.
Hnamdang Mistiri hnathawh dan chungchangah pawh hei, kan buai chu a ni nghal der tawh. A hming chuan ‘rate’ chu a awm ve a ni maithei; mahse ‘duh duh dana rate inchhiar’ tih tawngkam a awm tawh tlat!
Tuna kan buaipui mek heng - ‘Mizo hming hawh’ tih te, ‘mistiri rate mahni inchhiar’ tihte hi ‘sawrkar dan kalh’ thil vek a ni a, dan kalha thiltih a awm chuan a chinfel hna chu sawrkar mawhphurhna a ni. Mahse sawrkarin a chingfel duh lo emaw, a chingfel thei lo emaw a nih chuan, pawl hrang hrangten hma an lak mai loh chuan, ram leh hnamin a tuar dawn tihna a ni. Tunah pawh hian kan tuar tan mek chu a ni ber tawh a!
Hnam tlemte, hnam naupang, khawvel ningkhawng la varpawh lo kan nihna kha hriain, khatih laia min awptu British sawrkar khan inhung bikna dan Inner Line Regulation min lo siamsak hlauh a, chumi hmang chuan kan la inham tang hram hram a ni ber a. Khawvel lo her danglam zelah, hmasawnna kawng thar zawh chhoh ve zel a ngaih avangin hnamdangte nena thil tih ho a lo tul a, mahni hnam hlangin a awm theih loh tih pawh kan hria. Chutih rual chuan, inchen pawlhin thawk ho mah ila, ram leh hnam hmangaihna rilru kan put phawt chuan, hnamdangte hian min luahlanin min chimral thei lo.
Mahse, ram leh hnam hmangaihna rilru pu lova, sum leh pai therhlo hmanga mahni hnam nihna hralha a ruka hnamdangte lo thurualpui duh an pun chhoh zel chuan, kan thenawm state thenkhata a ram leilung fate zawk ‘bet tlawk tlawk’ ang dinhmun hi kan dinhmun tur chu a ni mai.
Chuvangin, tun hi inthlitfimna hun rangkachak a ni a, thirling den hun lai tak a ni. Sawrkar hian fet taka thil a tih loh a, a en liam mai mai a, a tihtur a tih loh chuan, buaina duhawm lo zawk hi a thleng thei. Hnam dangte hian sumdawnna kawngah leh hnathawhna kawngah hian min thunun chho tan dawn a ang ta riau mai a, kan thlir liam mai mai chhungin min lehthal phut thei tih hi kan vawn reng a pawimawh a ni.
