Hnam peng hrang hrang Kut
theih anga humhalh zel tur
– Chief minister
Mizo hnam peng hrang hrang Kut leh ze tha tinreng chu Mizo hnam thil pawimawh an ni vek a, a theih ang anga humhalh zel tur a ni tih chief minister Lalduhoma chuan a sawi.
Khawzawl district-a Ngaizawl khua chuan October 16 khan Khawdo Kut an hmang a. He Kut (Khuado Pawi) hi Mizo hnam peng Paite Kut ropui bera ngaih a ni a, chanchin hlui zirtu (historian) te chuan AD 1400 vel atangin an lo hmang tawh thin niin an ngai.
Hmanpuitu chief minister chuan, Mizo hnam peng hrang hrang Kut leh ze tha chu hnam thil pawimawh an nih vek avangin theih ang anga humhalh zel tur a ni tih a sawi a. Khawdo Kut hian ram leh hnam hmangaih a pawimawh zia min hrilh nawn se, tiin, “Ram leh hnam dingchhuak ni tura inbuatsaih a tulzia min zirtir se, kan tu leh fa lo la awm zel turten hlim taka an rawn hman zui ve zel theihnan hmathlir fel tak nei chungin, kawng dik takah kal i tumang u,” a ti.
Sawrkarin a tirah thlai thar pangaah support price a pe a, thlai dang paliah pek belh niin, a vaiin thlai thar pakuaah support price an pe a, kuthnathawktuten a rate hre sain thlai an ching ta tih a sawi a. Khaw taima Ngaizawl pawhin an tangkai pui ngei a ring tih a sawi a ni.
Chief minister hian tunhnaia Ngaizawl khawtlangin hmasawnna thar a hmuh thenkhat a sawi a. SASCI 2026– 2027 Part-I (untied) ah Ngaizawl to Tualpui kawng laihna tur cheng vaibelchhe 5.36 dah a ni a. Ngaizawl High School building-ah zirlai an len tawh loh avangin building zauhna atan chief minister hian nuai 25 a pe. Ngaizawl khaw kiangah van ruahtui leh luite tui dahkhawlna tur tuikhuah (Eco Tourism Water Harvesting Pond) liantham tak siam mek a ni a, a thawh zuina tur nuai 376 dah a ni.
Khawzawl to Ngaizawl kawng km. 13.340 a thui chu PMGSY-II hnuaiah ni 2024 April 1 khan thawh zawh a ni a. Dan angin 2029 March 31 thleng contractor-in a enkawl zui ang. A chhe zual chu kumin kumtirah khan siam a ni. Cheng vbch. 5.26 senna Ngaizawl Water Supply Scheme solar pumping NABARD RIDF-XXVIII hnuaia thawh chu kumin March khan zawh a ni. Ngaizawl khuaah hian self help group (SHG) 11 an awm a, startup cost leh revolving fund an dawng vek tawh. SHG-te hman tangkai tur hian ran chaw herna khawl pahnih dah a ni.
2025- 2026 sawrkar kum chhung khan Ngaizawlah ni za inhlawhna atangin mipui inhlawhna Rs. 49,85,702 a lut a, material component Rs. 47,75,500 nen, a vaiin Rs. 97,61,202 sen a ni.
Khawdo Kut hi bialtu MLA, adviser to CM Er H Ginzalala pawhin a hmanpui a ni. Khawzawl district bawrhsap K Vanlalthiana, SP Amit Kaushik leh district official-ten an tawiawm bawk.
Ngaizawl hi kum 1927-ah Burma atanga rawn tla thla Paite hnamten Tualpui lal ram chhungah, khatihlaia Tualpui lal Thanherhna phalnaa an din a ni a. A hnuah lal Thanherha fapa naupang zawk Khenchhuma chuan a awp zui a ni. Rambuai lai khan Khawzawlah khawm an ni a. Jhum permit hmangin Ngaizawlah hian bawk an khawh zui zel a. Kum 1927 atanga vawiin thlengin mei a mit lo tia sawi theih a ni. Tunah hian in 205 an ni mek a, mi 1200 vel an cheng.
Hnam peng hrang hrang Kut theih anga humhalh zel tur – Chief minister
