Social media hrang hranga hnam peng inkara inhuat theihna thu belhchian dawl lo thehdarh thinte chhuichhuaha hrem an nih theihnan Mizo Students’ Union chuan FIR an thehlut.
Youtube channel, Whatsapp, Facebook page, Telegram leh Instagram-ah Mizorama cheng hnam peng hrang hrang inkarah inhuatna chi tuh thei dawt leh thu belhchian dawl lo thehdarh a ni fo thin chu MSU chuan pawi a ti a. Hetiang tih hmangte hi zawnchhuaha hrem ngei an nih theihnan, Zirtawpni khan MSU chuan Cyber Crime Police Station-ah first information report a thehlut.
‘Mizoramah hian Zohnahthlak chi hrang hrang kan chengho a, chutih laiin thenawm Myanmar leh Manipur-ah Zohnahthlak leh Zohnahthlak inkarah innghirnghona a awm fo thin hi pawi kan ti hle a. Social media-ah thubelhchian dawl lo, Mizo hnam peng emaw tan hriat nuam lo tak thehdarh a nih fo chuan nghawng lian zawk leh pawi zawk, awlsam taka tharum thawhna tichhuak mai thei a nih avangin a pawi thei hle a. Hetiang thil tih chingte hi dan hmanga hrem an nih theihnan a tawp thlengin hma kan la dawn a ni,’ MSU chuan a ti.
Hnam peng inhuat theihna thehdarh thinte lakah FIR
