Hnam thinlung pu turin
CM-in zirlaite a fuih
Ram leh hnam hmangaihna rilru, hnam thinlung pu deuh deuh turin chief minister Zoramthanga chuan Mizorama zirlaite a fuih.
Zirtawpnia Govt Hrangbana College-in zirlai tharte lawmna leh zirlai tithate chawimawina an buatsaih a hmanpuinaah chief minister chuan, harsatna tuar kan unauten Mizoram chu kan inpui, kan tana hmun ralmuang a ni e, tiin an rawn pankhawm mur mur a, sawrkar, tlawmngai pawl leh mipuiin a theih ang angin kan buaipui theuh tih a sawi. “Heng hi Pathianin engemaw ruahmanna tha tak nei chungin kan hnenah a lo thlentir a ni ang tih ring chungin ram leh hnam hmangaihna rilru, hnam thinlung pu deuh deuh ang u,” a ti.
He ram leh hnam hi Pathianin malsawma tundin a, a rawngbawltu atana tih ngheh a tum avangin hun harsa tam takah mak takin a lo chhanchhuak tawh thin tih sawiin, “Vawiin thleng hian min hruai zel a, tuna kan harsatna hmachhawn mekah pawh hian min chhanchhuak leh ang tih vawng reng ang u,” a ti.
Zirlaite chu nun bul an tan mek chauh a, hmabak thui tak an la nei tih Zoramthanga hian a hrilh a. Kan hma lamah malsawmna dawn theihna leh anchhia dawn theihna kawng a awm ve ve a, zu leh ruihhlo laka kan fihlim lo a nih chuan anchhia; mimal, chhungkua leh khawtlang tana pawi leh thalo em em kawngah kan lut dawn tihna a ni tih a sawi.
Govt Hrangbana College principal Dr H Lalzidinga sawi danin, kuminah zirlai thar 560 an nei a; a tam ber hi Mizoram ami an ni a; Tripura atangin zirlai pahnih, Assam atangin pathum leh Manipur atangin pasarih an lut thar bawk. Zirtirtu indaih lohna phuhru turin sawrkar chuan zirtirtu paruk a pek belh a ni.
He hunah hian tunhnaia university exam-a titha zirlaite hnenah lawmpuina hlan a ni a. Hrangbana College zirlai, university exam-a a pumpuia titha ber hnena hlan thin ‘R Zatlaia Award’ chu Lalhriatpuia Ralte, Department of Commerce hnena hlan niin, CGPA 9.17 a score a ni. University rank holder (top 10 tling chin) hlan thin ‘Hrangbana Awards’ chu zirlai 22 hnena hlan niin, ‘Dr Suprakash Maiti Award’ chu Lalremsiami, Department of Commerce hnena hlan a ni. Zirlai 10 hnenah Merit Awards hlan a nih bakah Department Awards chu End Semester Exam-a ‘O’ level hmu chinte hnenah hlan a ni. Alumni Awards chu subject topper pahnih hnenah hlan a ni bawk.
Hnam thinlung pu turin CM-in zirlaite a fuih
