Rosangzela, Vh
Ph: 8974138026
A thling baw hawka Politician-te kap hreptu Pastor senior-in boruak a siam hluai lai khan, kan Politician hlun hmingtha taka Politics chawlhsan pakhat ka interview a. Pastor Senior thuchah chungchanga a ngaihdan ka zawt a, min chhan dan chu, “Politician-te hian kan nemngheh rawngbawltute an enkawl Kohhran miten an duhkhawp lohna lai hi vantlang hmaah puang chhuak chiam ila, an lawm bik emaw chu,” a ti vei roh a.
Ka thlir loh dan takin chhanna ka hmu a ni. MLA kan thlan kum a nih miau avangin mipui thinlungah Politics hi a lang lian a, kum 4 chhunga ngawi mai mai te pawh kan au sup sup a; thutak leh dawt inkarah kan leng mek a ni. Social media kaltlangin kan phun sup sup a, a lo dawngsawngtu lamin thuhnu pawh dawn chuang lovin kan chhang let sup sup a, bang leh lama thusawi chu bang leh lamah a ni lo deuhin a ri chhuak leh a; chutiangin mi zahawm nia kan ngaih Kohhrana nemngheh rawngbawltute pawhin thu an dim chuang lova, an beih chiam chiam te hi an beram te tho an ni a. Tuna kan ram leh hnam boruak hap chu lungawi lohna leh inrin lohna hi a ni, hei hi a vanduaithlak takzet a ni. Mipuiin Politician-te kan ring lova, Politician ten ram mipui hi an ring zo chuang lova, sakhuana lamah lah beram ten berampu an ring chuang lova, chutiangin berampute pawhin an beram te an ring zo chuang lova, na tak takin kan insawisel tawn luai luai a nih hi. Hnam vanduai mahni leh mahni inringtawn thei tawh lo kan ni e.
Kan hriat angin kan thenawmah kan mite leh hnam dang inkar thu a chhia a, an inrawk a, an inthat a. Mahni in lum chhuahsanin sahimna zawngin hmun tin kil tin an dap ruai a nih hi, an ram hrehawmna kan lo hriatpui a kan lo chhawmdawl mek a. Kan tawngtaipui a, an tan thawhlawm kan khawn awl lova, an mamawh kan tih ve theih chu hlah loh ram kan duh a ni. Sawi angin Manipur ramah remna leh muanna a awm theihnan kan tawngtai ur ur a, kan duh chu inrem sela, nunaute thlamuang takin awm se kan duh.
Mahse, vawiin ni thlengin an la inrem lo, eng vang nge? an mu tan chu an inringtawn tawh lo hi a ni, lehlam lehlam thla a ngam lo ve ve a ni. Hmun khata cheng an ni a, hnam thuhmun lo an la ni zawk, an tana tawngtai thinte chu hnam khat, tlang khat leh ruam khata cheng mahse inringtawn lote kan ni hlauh thung, a mualphothlak khawp mai. Political Party campaign au hla chu a taka thleng turah kan ngai ngam lo, an inziah mawi siak mai mai niin kan hria. Politician leh Party Worker ten keini chuan kan ti ve lovang an tih lawm lawm chung pawhin ngaihdan kan lo nei a, han sawrkar chiah se eng an ang bik lovang tih hi a ni tho tho.
Politician an tah chuan mipui lam chuan tap der hmuhin kan hmu a, Politician-te pawhin an hruai anmahni avanga MLA ni thei te chu an ring ngam chuang lova, uire leh mai tur hmuhin an hmu a, ngun takin ngaihtuah ila chhungrilah a dik kan ti ang. Sawrkar hnathawk lam han thlir ila, sawrkar hnathawk chu eiru hmuhin kan hmu fai leh deuh vek a. Peon pawh lehkha phek tal paipawn turah kan ngai a, a lian apiang kan rinhlelhna a zual a. Miin concrete building khir uai khawpin an sa a, a eng khaw sawi set set lovin a eiru a ni hrim hrim kan ti a, thenawmpain lirthei nalh tak a rawn khalh haw zur zur mai a, a hlawhin a daih lo, a staff te pawhin kan han ti zui leh a.
Hetiang hi kan inbihtawn dan dik tak a ni, hausa tura mi thawhrimna kan hmuh kan lui tlat a, kan inringtawn ta lo lutuk hi siam that a va tul em. Moral Reformation thlentir turin tunah chuan Political Party lam an pawimawh hle a ni, ka ti ve lovang ti ngamtu Party hi an sawrkar a nih chuan mipui rilru hi siam tha tel rawh se. Hnam inringtawn thei lo nih hi a vanduaithlak, chuvangin Ram hruaitute, Kohhran hruaitute, Tlawmngai Pawl hruaitute hian mawhphurhna lian tak an nei tih inhria sela. Kan hnamin a mamawh Moral Reformation hi thlentir rawh se.