Tribal Research Institute, Art & Culture department chuan nimin khan ‘Mizo tual zal nun – hman leh tun’ tih thupui hmangin seminar a huaihawt a. Seminar hmanpuitu art & culture director chuan, ‘pi leh pute nun dan tha leh mawi hriat leh chhawm nun chu hnam hmasawnna zel kan nihnaah kan tih tur a ni a, kan nihna dik tak kan hnam ziarang tha leh hlute hi kan hmel pholangtu a nih avangin kan hre chiang hle tur a ni,’ tiin a sawi a.
Hei hi a pawimawh; kan hnam ziarang tha leh hlute hi hriatchian a, kan nunpui zel theih nan thahnemngai taka hma lak a ngai tawh hle a ni.
Seminar huaihawttu art & culture department hian district tinah hetiang seminar hi huaihawt a nih theih nan ruahmanna siam thei se a duhawm hle. Tun lai thalaite khawlai nun han thlir hian, kan hnam nun dan tha leh ziarang hi an bosal mek niin a lang a. ‘Tunlai thalaite hi zawng, hnam nun dan mawi leh hlute hi an hre tawh lo’ ti liam mai lova, ‘eng tin nge thalaite hian pi leh pute nun dan tha leh mawi hi thangthar zel tan an chhawm nun zel theih ang’ tih hi ngaihtuah a ngai takzet tawh a ni.
Mizote hi China ram atanga lo chhuak kan ni tiin ‘Chhinlung chhuak Zofate’ tiin tun lai thlengin hla phuahtute chuan an la chawi vul chho zel a. Kan pi leh puten thlahtu bul atanga he hnam ziarang tha tak hi lo chhawm chho zel an nih chuan, hetiang nun dan mawi ching chhuaktu chu Chinese philosopher ropui tak Confucius kha a ni a. Confucius-a ngaisangtu leh a zirtirnate pawma zawmtu chu South Korean te hi an ni bawk a. Anni phei hi chuan, film/movies lamah an lantir awl lo a nih hi. Mizo thalaite hian Korean ngaihsan an intihhmuh laiin, an ze tha lam aiin a tha lo lam an entawn leh lawi a. Hetiang hi a taka kan vei a hun takzet tawh.
A bikin khawpui lamah hnam ziarang hi a dal chak hle a, a chhan pawh eizawnna thilah hnam dang nen kan lo inchiahpiah nasa deuh a, hnam dang tihdan leh chin dan tha lo lak ve mai a lo awl a, thingtlang khaw lamin hei hi an lo entawn hret hret a, hriat loh karin hnam ze mawi leh nun dan tha hi a lo dal ta mai thin a ni. Chuvangin, hetiang seminar hmanga thalaite kan hrilh a, kan zirtir chhoh zel hi hnam ziarang (culture) chhawm nun chhoh zelna atan a pawimawh hle a ni.
Hnam ziarang leh tunlai thalaite
