Hnam ziarang pholang thei milembu siam tum

Mizo hnam ziarang pholang thei milembu siam tuma ruahmanna a awm mek tih School Education minister Dr Vanlalthlana chuan a sawi.
School Education department leh Samagra Shiksha tangdun hnuaia District Campaign Committee buatsaih, District Education Reforms Campaign chu Mizorama a vawikhatna atan Nilaini khan Hnahthial district-ah hman a ni a. School Education minister bakah South Tuipui bialtu MLA Jeje Lalpekhlua ten an hmanpui.
Minister chuan Mizorama zirna siamthat nan he hmalakna hnuaia tih tur hmachhawp hrang hrang sawiin, tunhnaiah zirna siamthat nan theihtawpa hma an lak mek thu a sawi.
Zirlaiten zirna khaihlak loa an zir theih nan school zawng zawngah lehkhabu a rang thei ang bera sem an tum thu a sawi a. Class 3, 5 leh 8-a random examination kalpui dan tur leh zirna ina hun vawndik a nih theih nana technology hman tangkai dan tur a sawi bawk.
Zirna in-in a mamawh zirlaite lehkhabu mai ni lo, infiamna hmanrua tih changtlun tum a ni tih Dr Vanlalthlana hian a sawi a. Zirlaite chhiar tur, zirtir hrang hrang nei bakah kan hnam ziarang pholang thei milembu siam tuma ruahmanna a awm mek thu te a sawi.
Education Reforms Campaign hmannaah hian Hnahthial Govt. Southern High School Pipe Band Academy hawn niin, Teacher Resource Package – tablet chu school hrang hrang hnena sem a ni bawk.