Hnamdang enkawl petrol pump-ah hma la zui dawn
September 17-a Mizorama hnamdang enkawl petrol pump khar sak an tum chu sawrkar ngenna avang leh mipui hmakhaw ngai chungin an thulh rih tih Mizo Zirlai Pawl chuan an sawi a. Hnamdang enkawl petrol pump chungchangah erawh a tul anga hma lak chhunzawm zel an tum tih an sawi.
MZP Gen. Hqrs. thuchhuak chuan, Home secretary Pu Vanlalmawia kaihhruaia All Mizoram Petroleum Dealers Association (AMPEDA) leh MZP hruaitute thukhawm rel angin, AMPEDA chuan MZP laka a thil phut a hnuklet a, September 17-a petrol pump khar an tum pawh an thulh. September 17 atanga Mizorama hnamdang enkawl leh hnamdang thawhna petrol pump khar tura MZP Hqrs, Sub-Hqrs, Branch leh Hnampual zirlai pawla an thawhpuite hnena hriattirna a lo tihchhuah tawh chu, sawrkar ngenna avang leh mipui hmakhaw ngai chungin a titawp rih a. Hnamdang pump enkawlte chungchangah erawh a tul angin hma a la chhunzawm zel dawn tih a sawi a ni.
Hnamdang, Mizo hming hawh leh hnamdang (Vai) sumdawng an pung zel chu a vei avangin MZP Assembly awm turah pawh, “Mizo hming hawha hnamdang sumdawn tirte na taka hremna dan sawrkarin siam se, a tul anga dap chhuah thin ni rawh se” tih chu rel tur zingah dah tel niin, a tul angin Assembly rorel bawhzui hian MZP chuan hnamdang sumdawngte dapchhuah kawngah hma a la dawn tih a sawi.
MZP chuan, Mizoram leh hnam himna atan theihtawp a lo chhuah tawh thin a, ram leh hnam a him theihna turin hma a la chhunzawm zel dawn tih sawiin, Mizo mipui pawh sum leh paia hlawkna ringawt um loa, ram himna leh hnam damna atan kan hming leh ram hnamdang hawhtir a, sumdawnna atan hman tir lo turin a ngen tih a sawi.
‘A tul anga dapchhuah kawngah Zoram mipui thawhpuiah kan sawm a, a bikin village /local council leh tlawmngai pawl hrang hrang sawmin kan ngen. Sumdawnna atana mahni hming hawh tir mekte pawh, ram leh hnam a lo him zawk theihnan hnamdang an thawhpuina titawp vek turin kan ngen a ni,’ MZP thuchhuak chuan a ti.
Hnamdang enkawl petrol pump-ah hma la zui dawn
