MNF sawrkar kum li leh a chanve chhunga an hnathawh a lungawithlak nia chief minister-in a sawi chu mak an tih thu ZPM Thalai chuan sawiin, lungawithlak a tih chhan sawifiah turin an phut tih an sawi.
ZPM Thalai Hqrs. thuchhuak chuan, kumina Aizawl Sipai Lammuala Independence Day lawmnaah chief minister Pu Zoramthanga hian, kum li leh a chanve chhunga an hnathawh a lungawithlak thawkhata a hriat thu a sawi tih sawi chhawngin, an hnathawh lungawithlak chhan tur an hriat loh thu a sawi.
‘A (chief minister) duhsak zawngte hnena restricted tender pek, Kamrula leh ama tupa Zoramchhana hnena contract hna lian zawng zawng deuhthaw a pek, Airport sak chim leh hna chhe lutuk, Chakai farm-a broccoli leh dhania hlir awm, SEDP Board phuahchawp avanga kumtin mipui sum cheng nuai za tam luangral ziahte chu em ni lungawithlak a tih chhan, tih hi kan zawhna a ni,’ a ti.
2018 inthlan hmaa Pu Zoramthanga’n traffic jam awm tawh lohna khawpuia Aizawl siam, kawng chhawng siam, chhungtin hnena SEDP cheng nuai 3 pek, Mizo buh hlir ei tawh tur thu tea mipui tiam bakah sawrkarna an chelh hnu ah pawh Lammual atanga Assam Rifles sawnchhuah, mau chin hlawhtin avanga IAS bang an awm tur thute nen lam a la tiam chhunzawm tih a sawi.
‘Chief minister leh MNF sawrkarin mipui laka an thutiam hi a hlawhtlinna hmuh tur mumal pakhatmah a awm loh lai a, an term tawp dawn Independence Day an hman hnuhnun berah pawh an sawrkarin hna a thawh that thu CM berin a chhak chhuak hian mipui a thawng hle a, term tawp dawn thlenga CM a tawngvai reng mai hi mipui zah lohna lian takah kan ngai,’ ZPM Thalai chuan an ti.
MNF sawrkar chu siamthat leh ngaihna awm loa a ngai bakah anmahni ah beisei tur dang a awm chuan loh avang leh, inhmuh chhuah nachang an hriat loh avangin Pu Zoramthanga kaihhruai sawrkar chu hunin a liampui mai dawn niah an ngai tih a sawi bawk.
Hnathawha lungawi chhan sawifiah turin CM an phut
