MPL 24/25 a league winner hmasa ber kan lo nih tawhna humhimin Aizawl FC chuan MPL 25/26 khelh 14 atangin goal 11 kan chhuah a, goal 40 lai mai kan khung bawk. League winner trophy hi season hmasa atang chauha siam a la ni a, Aizawl FC ta bik emaw tih mai tur in club dang in an la dek ve miah lo. Hneh takin season an thunun thin bawk.
Heng zingah hian Khawbel tlangval Zomuansanga chuan Police striker Valpuia’n season khata goal score tam ber record a siam kum 10 dawn lai mai lo ding tawh chu goal 16 lai mai nen a rawn khum chiang hle. Zomuana hi player thawkrim tak a ni reng a, a par vul nghal mai bik lo. A parvulna phen a thawhrimna te pawh ziah duah chakawm viau mahse Zomuana hi club a contract nei lai leh inelna hmachhawn zel tur a nih avangin a hun ber rih lo a, a remchan leh kan la ziak leh dawn nia.
Season tir khan inchawi ta ila thenkhat chuan Aizawl FC ah hian ngaihngam takin an thap miah lo ang. Vanneihthlak takin Aizawl FC a ka hun tawn hi a nuam sa thei viau mai. Club neitu Pu Robert Romawia Royte leh kan hotu dangte remruat thiam zia leh Aizawl FC Pathian in a awmpui zia hi hriain ka in hre ve a.
Hun harsa tak tak hmachhawn thin mah ila a hun ah tak kan him leh hlauh thin. Tun season phei chu player tam zawk kan chan a, a chamte hi dik tak a sawi chuan regular lutuk ngai lem lo leh Aizawl FC academy atanga zi chhuak hlim hlawl te an ni hlawm Club neitu ber Pu Robert a sawi hmaih theih loh a, a hun tamtak Aizawl FC tan a hlantu Pu Hmingthana pawh rilru a lang hmasa a ni thin. Aizawl FC tana theihna lo seng tawh leh kan zinga awm ve ta lo te pawh rilru in a hre reng mai. Tin, tun season hi Aizawl FC academy parvulna a tih loh theih loh a, mahse academy atanga par rawn chhuang chho tur hian mihring, hun leh pawisa a mamawh zat erawh a man a tam hle.
A kaihruaitu ngar ngar Pu Robert Romawia Royte hi a chang chuan mak ka ti zawk thin. Aizawl FC a enkawl tawhna belh khawm hi digit tamtak in rin aia tam daih tur a ni tawh. Cheng tamtak hlauh huamin Mizo thalaite infiamna eizawnna an neih theih nan sum a seng a, keini chu ni ila kan tha a na hma ngawt ang. AFC in trophy kan chawi zan ah pawh hian a hma daih atang tawhin fans te nawr ngai awm miah lo in a phur ber ah a tang a, mipui zawk hian kan thlawp tha lo ka ti thin. Sports Minister chak tak pawh a lo ni tawh reng a ni. A hnual ve mai ngai lo hi ka ngaihsanna pakhat a ni bawk. Tun ah pawh Aizawl FC rawlthar rual awmna team hmuh nuam tak a din mek pawh hi a beih reina nen ka lawmpui in ka tan lehzual hle. Hruaitu a nih bak ah hmahruaitu a ni tel a ni. Tun ah hian Aizawl FC field tur chu Hitachi nen laih mup mup mek a ni a, febuary thla velah phul lem phah chu zawh theih kan in beisei bawk.
Aizawl FC ah hian mizo player danglam tak academy pum chhuak ngei hmuh ka chak thin. Tam vak lo chu ka hmu ve ta a, ka lawmna ti zualtu a ni. Sawi tawh thin angin a tirah academy ka thlan vangin academy a kan chin thin leh zirtirna leh inzilhna te kha ka la hre reng a, a la hre reng player te phei chu hlawhtlinna chang tamtak an awm tawh. Kan Coach lo neih tawh hrang hrang te, Pu Robert te hian min hrethiam em em a, football ka ngaina nasa ropui si a, a tak a han ti chi zia zang ka ni si lo a. Ka tuihalna min hriatthiampui in a hmingin match lo vil vetu Analyst min nih tir ve thin. Pu Roberta leh coach ka lo hrawn tawhte chungah lawmthu ka sawi nawn leh duh bawk. Chumi zar ah chuan MPL league winner a zawn in hneh loh nei lo a kan nihna ah pawh hian Analyst ka nih ve theih phah a, ka dam chhung sawi a tling tawh ngei ang. Club dang ka beisei chuang lo a Analysis ka tih theih lai ngei a duhthusam I-league season han hman leh chu ka chak khawp mai. Trophy zuk chawi chakawm hle mahse min duhsakna zawng zawng ah a lawmawm in inthlahrun te pawh a inthlahrun awm a, TV lam atangin ka lo en ta zawk a ni. A lawmawm dan a danglam chuang lo.
Tun season phei chu a tirah thil dang a rilru pek lawk ka duh vangin awl ka dil a, season laklawh laiin coach Sir Ruatfela nen kan titi pahin ti leh tur in min ti a, team chet that lai tak a ni si a tih buai zawk ka hlauh thu in ka chhang a. Inthlahrung lo tur a min tih tak ah chuan season laihawl atangin analysis ka chhunzawm leh thei ta. Sir Rualfela hi Aizawl FC a rawn zawm hma daih atanga a hming kan hriat thin a ni a, a hriatna a zauin tawngkam Mizopa tak mai a ni a, a hnen a report pek a awlsam phahin a hahdam thlak thin khawp mai.
Hneh loh nei loin a zawn a League winner kan nihna ah hian tawp tur kan la ni lo a top 4 chinin semi final khel in MPL champion zawnna neih a la ni dawn a MPL champion zawnna la neih tur leh kan hma ah I-league hmachhawn kan neih tur a Mizo club hlun ber hian mizo mipuite thlawpna hi thlawpna dang zawng aia a beisei san a ni a, inkhel en boruak hi stresss out nan vel pawh a tha khawp mai. Inkhel rawn en ula stadium ah kan inhmu tlang thin dawn nia.
Ziaktu : Red Wheelchair
Hneh loh nei lo Aizawl FC
