Hliamin a bawhbehna atanga talchhuak lehin Thawhlehni zan Barcelona Open first-round match pakhatah straight sets hmangin Rafael Nadal a chak a, tawnhriat nei tlem Italian Flavio Cobolli lakah 6-2 6-3 hnehna awlsam a sualchhuak.
Thla 15 liamta chhung khan Spaniard hi hliamin a tlakbuak chho reng a, khatih chhung khan competitve match pawh vawili chiah khelin, kumin hi a career-a a season hnuhnungber tur a nih thu a lo sawi tawh nghe nghe a ni.
Grand slam singles title 22 la tling tawh Nadal hian June thlaah kum 38 a kai chho ve tawh dawn a; ATP ranking-ah 644-na daih niin, dulthuar leh khel bawr na avangin tun kha kumin January thla hnu lama khelmual a luh leh vawikhatna chiah a ni.
Professional player ni chunga a kum hnuhnungber hmang mek Nadal hi khel bawr na avangin nikum French Open atangin a inhnukdawk a, clay-courter piangchhuak tawh zinga tha bera ngaih hian kumin French Open-ah hnuhma tha hnuhnung a hnutchhiah thei dawn em hriat phak a ni rih lo.
Kumin hi a tennis career-a a kum hnuhnungber a nih theih tawh thu sawichhuak tawh mah se Barcelona-a a kirleh hma lawk khan Spaniard hian a chawlh hun turah tiamchin (deadline) a kham lo tih sawiin, la man tawka a ngaih chhung a la inkhel zui zel dawn tih a sawi leh rih!
Thawhlehni zan hnehna kha Nadal-a tan hmasawnna tha lam niin, thla thar maia khelh chhoh tawh tur Roland Garros-a kirleh a tumna kawnga beiseina siamsaktu a ni.
Barcelona Open second round-a Australian world number 11 Alex de Minaur hmachhawn leh tur Nadal hi Barcelona-a champion ngun ber niin title 12 a la tling tawh a; tun hi ni 681 chhunga clay-court match a khelh leh vawikhatna niin, 2022 French Open final-a a chak hnua a hmasaber a ni.
Hnehna nena kir Nadal
