Hnute tui donate hnem record siam
Nu hnute tui hnek tur nei lo nausen tan Alyse Ogletree chuan a hnute tui a donate thin a, a hnute tui donate hi litre 2,645.58 a tling tawh a, Guinness World Records chuan khawvela hnute tui donate hnem berah a puang.
Alyse, kum 36 hi Texas, USA a cheng niin, 2014 khan hnute tui litre 1,569.79 donate-in record a siam tawh a, chu chu a record siam vawi khatna a ni. Alyse hian Mother’s Milk Bank, North Texas-ah a hnute tui hi a donate thin a, hei bakah hian a thiante leh Tiny Treasures Milk Bank tan pawh a donate nual tawh a, mahse heng hi chu a record siamnaah hian chhiar tel a ni lo.
Alyse chuan hnute tui donate chu midangte a tanpui theihna a nih avangin nuam a tih thu a sawi a, “Sum tam tak nei mi ka ni lo a, midang tanpui nana sum theh chhuak thei ka ni lo, kei pawhin chhungkaw enkawl tur ka nei ve si a. Chuvangin ka tih theih ve zawng nu hnute tui hnek tur nei lo nausen te tan ka hnute tui ka donate ta a ni,” a ti.
Alyse hian 2010 khan fapa Kyle a hring a, chuta tang chuan hnute tui donate hi a ti tan ta a ni. “Ka hnute tui a tam hle mai a, paih then te a ngai zawk a, chutiang karah chuan nu tam tak an fate hnute tui pek tur nei lo an awm tih ka hre ta a ni,” a ti.
Alyse hian Kyle bakah fa dang pahnih Kage, kum 12, leh Kory, kum sarih, te a nei tawh a, hei bakah hian midang fa tur a hrin sak (surrogate) tawh bawk a, fa a hrin apiangin hnute tui a ngah thei hle a, chu chu a donate ta thin a ni.
Hnute tui donate hnem record siam
