November 14 khan India ram pum huapin Naupangte Ni (National Children’s Day) hman a ni a. Mizoram State Legal Services Authority leh Aizawl District Legal Services Authority tangdun chuan a hrang ve ve in Hermon Childrens’ Home Durtlang leh TNT Zuangtuiah naupangte pualin hun an hmang a, intihhlimna hun an buatsaih sak.
Home pahniha hun an hman hi Mizoram State Legal Services Authority member secretary Gracy L Bawitlung hoa neih a ni a. Aizawl DLSA secretary Lalrochami Ralte chuan kaihruaiin, Hermon Childrens’ Home superintendent Lalremruata leh TNT secretary Malsawmtluanga ten an Home chungchang report an pe. Advocate PC Lalchhunga’n naupangte dikna chanvo chungchang leh naupangte tan hamthatna awm thei hrang hrangte a sawi a ni.
Hermon Childrens Home Durtlangah hian naupang enkawl lai 42 an awm a; TNT Zuangtuiah hian 200 vel enkawl lai an awm.
Champhai District Child Protection Unit chuan Naupangte Ni denchhen hian Champhaia home pathum – Genesaret Gospel Childrens’ Home, Observation Home leh Rose Children’s Home ah thilpek an hlan. Heng home pathumah hian belhkhawmin naupang 57 an awm mek.
Home-ah Naupangte Ni hmang
