Home minister K Sapdanga chuan Thawhlehni khan Sainik School Chhingchhip a tlawh a, Unit Run CSD Canteen thar a hawng nghal.
Sainik School chu zirna piahlamah ram leh hnam tana mi rinawm, hruaitu tha leh discipline nei tha tura inzirtirna a nih tel avangin ram leh hnam tana huaisen, inpe leh rinawm ni tura naupang chherchhuahna a ni tih a sawi a. Armed forces lama an kal zel emaw civil service emaw eizawnna dang eng kawngah pawh kal se, he hmuna zirtirna tha tinreng an dawn chu hmang tangkai zui a, vawng reng turin a chah tih a sawi.
Ramin mihring chak, rilru lama hriam, thinlung nghelnghet mi a mamawh tih sawiin, Sainik School chhuakte chu ram leh hnam inpumkhatna tinghettu ni a, ram danpui chawinung a, khawtlang tana thawhhlawk tak nih tum zel turin a chah tih a sawi bawk.
Sainik School Chhingchhipa Unit run CSD Canteen hawn thar chu mipui vantlang tan bungraw man tlawm zawk leh tha tak tak an chhawp chhuah sak zel a beisei tih a sawi a ni.
Home minister hi MLA Lt.Col. Clement Lalhmingthanga, Home secretary Vanlalmawia, Home department hotu dang leh 14 Assam Rifles hotuten an tawiawm a. Sainik School principal Col. Soumyabrata Dhara hoin thawktuten lo dawngsawngin, school naupangten lam leh thiamthil dang an entir a ni.
Home minister-in Sainik School tlawh
