Ni li chhung awh horticulture fair vawi 13-na Aizawl Lammuala neih chu kar kalta Inrinni June ni 20 khan zawhfel a ni a. Horticulture fair hi kum 2012 atanga neih tan kha a ni a, Covid-19 avangin kum hnih chhunzawm lohvin a awm a, tun tum hi a vawi 13-na a ni.
Report-a a lan dan chuan horticulture fair atanga stall neituten an hralh chhuah tawh zat belh khawm hi kum 2025 thleng khan Rs 3,76,90,607/- a tling tawh a. Tun tuma Fair-ah hian ni li chhunga lei chhuah zat chu Rs 99,09,326/- a ni bawk. Chuti chuan, Horticulture Fair vawi 13 neih tawh atanga lei chhuah zawng zawng chu Rs 4,75,99,933/- (Cheng vaibelchhe 4.7 chuang) a tling a. Kum 13 chhung hian horticulture fair avangin kum tin chawhrualin cheng nuai 36.6 chuang a che vel thin tihna a ni a, pawisa heti zat state pawna luang chhuak lova, mahni state chhunga a han vir vel hi a hlu ve hle a ni.
Hetih rual hian, tanlakna tur leh hmasawnna tur chu kan la ngah hle tih a hriat. Entir nan, tun tumah hian Stall 273 a awm a, chawhrualin stall pakhatin Rs 13,412 hu a lalut tihna a ni. Ni li chhung neih a ni a, ni tin chawhrualin stall pakhatin Rs 3353/- a la lut tihna a ni bawk. Hei hi a sum lei chhuah a ni a, a hlep (profit) tur hi 20% vel anga chhutin, ni khata a hlawh chhuah, a hlep tur chu Rs 670 tihna a ni. Transportation charge leh anmahni senso neuh neuh nena chhut chuan eng tham an hlawh lo tihna a ni. Hei hi chawhruala chhut a ni a, thenkhat cheng sing bi-a hlawk an awm theih laiin thenkhat erawh chawi belh pawh a awm theih ang.
Tun tum Fair-ah hian bonsai siam leh enkawl dan te, greenhouse enkawl dan te, thlai venhimna damdawi hman dan te, pangpar khawi dan te leh bamboo vinegar hman dan te inzirtirna hun hman a ni a. He lama tui mite tan chuan programme chhenfakawm tak a nih a rinawm. Chutih rualin, hetiang programme hlu tak hi thingtlang khaw hla zawka awmte ban phak tura an awmna hmuna ‘kal-chilh’ programme hi kalpui uar deuh theih nise, tun ai hian kan la hlawkpui tlang deuhin a rinawm.
Eng pawh ni se, hmasawnna tur leh tanlakna tur tam tak a la awm a, thlai leh thei thlan chhuah bik item pahnih khat tala intodelh tura hma lak ni thei se a duhawm hle a ni.
Horticulture Fair Chhiarkawp
