Hotute demna leh deusawhna hi
underground lai atanga awm tawh
– Zoramthanga
MNF-ah hotute demna leh deusawhna chu an underground lai atanga awm tawh a ni chungin, tling lo leh famkim lo tak chung pawhin ral loin an la kal zel tih MNF president Zoramthanga chuan a sawi.
February 25, 26, 27 chhung khan MNF president hian Champhai, Samthang leh Khawzawl a tlawh a. Party mipui kalkhawm hmaah MNF chu harsatna tuar chhuakin a tho leh thin, tia sawiin, harsatna engemaw a lo thlen hlekin a then chu an zam palh fo a. Pathianin a hun takah a hungchhuak leh mai zel tih a sawi. “Hotute sitna, demna leh deusawhna, hmuh tlin lohna hi underground hunlai atangin kan tawk tam tawh. Mahse, tling lo leh famkim lo chung pawha Pathianin a kaihhruai party nghelnghet ber chu MNF hi a ni a, kum 64 Pathianin min hruai tawh,” a ti.
Thangthar hruaitu tha tak tak an lo chhuak zel anga, MNF chu martar-te thisena lei a nih vangin kehchhiat emaw rauhsan a tawk ve dawn lo, tiin, party dang chu an ral vek tawh a, an ral zel a, an ral mek bawk tih a sawi.
Tunhmaa MNF-in an ngam loh lian ber chu Mizo Union niin, an ral vek tawh a; a hnua an ngam loh thin chu PC party niin, tunah an ral leh tawh a; Congress pawh er tham an awm tawh lo tih Zoramthanga hian sawiin, “Khulama an hmunpui a inphet thlu deuh vek tawh a, helama thawhchhuah leh ngaihna a awm tawh lo. Tuna kan elpui awmchhun chu ZPM chauh an ni,” a ti.
2023 inthlanpuia MNF tlak chhan leh ZPM chak viau chhan chu Pathianin tum a neih vang a ni tih pawm a ngai nia sawiin, an intawng thlamuanna emaw an inhnemna tawngkam ermaw niloin, Pathianin ZPM sawrkar tir a duh chhan chu ngaihtuah ngai zawk a ni tih a sawi.
“Kalphung thar an ti a, kum khat chhung lek an sawrkarah pawh thil mak leh mipui beidawnna, sawrkara la thleng ngai lo leh tih ngai loh a thleng tam hle. Heng zawng zawng hi chunglamin ZPM nihphung dik tak mipui hriatchian tir min tumna hmanrua a ni. Engkim zirlawk leh hrechiang sa, ‘research base’ in kan kal dawn, an ti a. Sawhthing lei dan atang ringawt pawhin, an hotupa ber a mangang nghal a, inkhualtelem sawrkar an nih dan zawng zawng kan hmu fiah chho zel a, itawm bera insawi kha a letling thawk an nih zia kan hmuchiang zel dawn a ni,” MNF hruaitu hian a ti.
Village council leh local council inthlanah reng reng, Congress sawrkar leh MNF sawrkar an chak vung vanglai chuan VC/LC an la fai deuh vek zel a. ZPM-ah chuan an phur ber laiin, thla 6 zetin inthlan an sawn hma chung pawhin ruling laia che chhe ber sawrkar an ni tih a sawi. Kal ngaihna an hriat loh luatah zu zawrh nge, BJP zawm tur tih an buk vel mai mai a ni ber tawh nia sawiin, “Heng hian MNF lo chu he ram tana dingchang leh tur a awm loh zia a entir,” a ti.
Hotute demna leh deusawhna hi underground lai atanga awm tawh – Zoramthanga
