Parliament Session neih zawh takah Manipur buaina chungchang chu ruling bench lamin sawi phal lo mah se, national media lamin an ngaihven avangin MNF dinna an sawi theih phah tih Lok Sabha member C Lalrosanga chuan a sawi.
Thawhtannia Mizo Hnam Run inkhawmah MNF adviser ni bawk C Lalrosanga chuan Parliament thutkhawm chhung khan Manipur buaina kaihhnawihah thu in nasa takin an inkap reng a. Central leh Manipur sawrkarin an tih tur an tih a ngai, tiin, na takin all party meeting-ah an sawi tawh a. MNF president Pu Zoramthanga’n huai tur leh Zofate tana ding nghet tlat tura a tih angin, theihtawp an chhuah tih a sawi.
State dang MP-te lakah chuan pawimawh tham lo hle mah se, an vei a pawimawh si a. NDA meeting-ah Manipur leh UCC chungchang sawilan an phal loh avangin thu a sawi duh loh phah a. A hnulama MP inkohkhawmah pawh Manipur leh UCC chungchang sawi an phalloh avangin an haw phah a. A hnulam meeting-ah pawh an tel duh loh phah ta zel tih a sawi. Session-ah Manipur chungchang sawi a tum a, thusawi a dilna chu a pilbo zel a, adjournment motion a thehluh pawh hnawl a ni, tiin, House-ah no confidence motion thlawp turin a thu tluan parh tih Lok Sabha MP hian a sawi a ni.
“House-ah hmui phuarsak ni mah ila, national media lamin Manipur buaina chungchanga kan dinna an hriat avangin, min bawr nasa a. Na tak leh huai takin kan dinna ka sawi theih phah. NDA lama kan thiante pawhin min be tha duhloin, chibai pawh ka dawng thei ta mang lo hial a. Chutihrualin, kan unaute an lawm em em a, lawmthu ka dawng nasa a, inpumkhatna pawh a ngheh zel phah niin ka hria,” C Lalrosanga hian a ti.
House-a sawi an phal loh Media lamah sawi phah
