House ah Emergency bawk chai zui

Lok Sabha Speaker Om Birla chuan Spreaker atana thlan a nih hnu lawkah India rama Emergency puan a nih demna leh khatih laia Prime Minister Indira Gandhi chet lakna chu Constitution beihna tia resolution a chhiarchhuah chuan house-ah Opposition ten lungawilohna an lantir nasa hle.
Birla-an Emergency chungchang a sawi avang hian sorkar leh opposition lam te chu Lower House lamah an intawng nasa hle a ni.
“He House hian na takin kum 1975-a Emergency puan kha a dem a ni. Emergency duh lova hmalatu zawng zawngte hmalakna kan chhuang a, India democracy humhim tuma hma late an ni” tiin Birla chuan Opposition tena an aukhumna karah a sawi.
Opposition MP te a bik takin Congress MP te chuan an thutna atanga dingin Emergency sawina kaihhnawih lakah slogan an aupui bawk.
“June 25, 1975 kha history of India a black chapter a ni reng tawh ang a. He mi ni hian khatih laia Prime Minister Indira Gandhi chaun ram pumah Emergency puangin Babasaheb Ambedkar siam Constitution a bei a ni” tiin Speaker chuan a sawi a.
Birla chuan India chu khawvel pumah mother of democracy tia hriat lar a ni a ti bawk a. “Democratic values leh debate te India ramah thlawp reng a ni a. Democratic values te humhim reng a ni a, chu mai ni lovin fuih zel zawk a ni. Chung karah chuan Indira Gandhi khan India ah dictatorship a kalpui a ni. India democratic values te chu rah hrual niin freedom of expression te chu rah behin a awm a ni,” tiin Birla chuan a sawi bawk a.
“Khang hun lai khan Opposition leader te chu lung inah khung an ni a, ram pum chu lung ina chhuah a ni a. Khatih laia dictatorial sorkar khan media-ah khuahkhirhna tam tak siamin judiciary autonomy te pawh a khuahkhirh a ni,” tiin Birla chuan a sawi bawk.
Congress leader Shashi Tharoor chuan, “He hmalakna hi thil tul lo lutuk ram tana tulna nei lo BJP tena an khelh mek a ni,” tiin a sawi thung a.
“Speaker thlanna pawh tha taka neih a ni a, Opposition leader te pawhin pawmpui thlapin Speaker thawhpui that an intiam a ni. Chutih laia Speaker berin chung spirit te chu pawisa lova Emergency behchhana inthen darhna lam hawia hmalakna a nei hi a tul hauh lo” tiin a sawi.
“Kum 1975 hnuah Ganga luipuiah tui tam tak a luang tawh. Indira Gandhi ngei pawhin a inchhir thu a sawi a. Kum 1977 inthlanah a chak loh phah bawk. BJP te hian hnunglam darthlalang chauh ena car khalh an sim a ngai. Treasury bench zawkin lungawilohna an lantir hi a mak a. Lungawilohna lantir an duh chuan Opposition lamah thu se, hun remchang kan lo pe ang. Hetiang hi term thar bultanna tur a ni lo. Emergency kha thil kal fel tawh leh liam tawh a ni a, vawiin hian institution rah beh chungchang kan sawi zawk tur a ni a. Kum 45-48 vel kalta thil thleng sawi lovin thil dang zawk sawi tur kan ni” tiin Congress MP Karti Chidambaram pawhin a sawi bawk.
Lok Sabha Speaker Birla chuan term hnihna chelh tura thlan a nih hnuah buaina siam lova constructive criticism leh debate hmanga House chu kalpui a beisei thu a sawi a. treasury leh Opposition benches te chu House kalpuitu ber an nih thu sawiin indian democracy chu House thataka kalpui leh tute pawhin remtihtlanna hmanga kal a nih thu sawiin party member pakhat chauh nei pawhin hun a mamawh ang a nei ang, a ti bawk.