Sorkar chuan September 19 khan Lok Sabha leh Assembly a hmeichhiate tana seat hmun thuma thena hmun khat hauhna tur kum 27 zet tihfel theihloha awm tawh constitutional amendment bill chu a pharh.
He bill hi parliament building thara bill pharh hmasak ber niin sorkar chuan state leh national level-a policy siam kawngah hmeichhia tam zawk an inhnamhnawih theihna tur leh kum 2047 a India developed ram a nih theihna tura hmalakna pawimawh tiin a sawi.
He bill hi Nari Shakti Vandan Adhiniyam tia vuah a ni a. Party hrang hrang ten Lok Sabha leh State Assembly ah te hmeichhiate tan seat hauh an ngiat bawk nen, he bill hian harsatna tawk lovin pawm mai a nih rin a ni bawk.
Mahse, a taka kalpui tur erawhin hun mamawh deuh tura ngaih niin kum 2024 Lok Sabha inthlanah chuan hman hman a beiseiawm loh thung a, a chhan chu delimitation exercise chu zawh fel phawt ngai a nih vang a ni.
Lok Sabha-a thu a sawinaah Prime Minister Narendra Modi chuan Union Cabinet chuan bill chu thawhtanni khan a pawmfel thu sawiin, sorkar chuan ram hmasawnna kawngah hmeichhia tam zawk tel se a duh a ni tiin a sawi.
Khawvel chuan hmeichhiate kaihhruaina ram chhunga hmasawnna thleng te a hmu a, Indian hmeichhia ten sports atanga startups thlenga danglamna an siam a hmu a ni, tiin prime minister chuan a sawi bawk.
Bill chuan reservation chu kum 15 kalpui tur tia sawiin hmeichhiate tana reserve seat dahah SC/ST quota a awm ang a ti bawk.
Constitution (One Hundred and Twenty Eighth Amendment) Bill, 2023 chu Lower House-ah supplementary list of business kaltlangin hmelhriattir a ni ta a ni.
Reservation hi delimitation exercise neih fel hnuah kum 15 kalpui a ni ang tih a ni bawk a. Hmeichhiate tana seat reserve dan chu delimitation exercise neih zawh apiangin a chhawka siam a ni ang tiin bill chuan a tarlang bawk.
Sorkar chuan hmeichhiate chu panchayats leh municipal body-ah te an inhnamhnawih tam a, mahse State Assembly leh Parliament-ah te an la tlem a ti bawk.
Hmeichhiate telna chuan legislative debate leh thutlukna siam kawngah thlirdan dang neih tirin a ti tha a ni, a ti bawk.
Lok Sabha leh State Legislative Assembly ah te kum 1996 atang tawh khan women’s reservation bill a awm theih nan hmalak tawh a ni a. Hmalakna hnuhnung ber chu kum 2010 kha niin Rajya Sabha-ah women’s reservation bill passed a ni a, mahse Lok Sabha a paltlang zo lo a ni.
Tun dinhmunah India rama Lok Sabha bikah hmeichhia Member of Parliament 15% vel awmin State Assembly-ah chuan 10% pawh an tling pha lo thung.
House-ah Women’s reservation bill pharh
