Hrangchalkawn Out Post tharthawh
National highway kawngpui laih zauh hna thawhin a sutbuai avanga 2023 February atanga tihtawp tak, Hrangchalkawn Police Out Post bul tan that leh tur chu Ningani khan Lunglei South bialtu MLA Lalramliana’n a hawng.
Lunglei district-a police out post awmchhun Hrangchalkawn Police Out Post hi hun engemawchen kalpui a nih hnuah a hmunhma hmasa chu national highway kawngpui zauh tur nen a insut buai avangin thiah ngai dinhmunah a ding a. In dang luah tur a awm mai loh avangin Police Headquarters (PHQ) pawmpuina in February 2023 atang khan tihtawp a ni.
Bialtu MLA leh councillor te hmalakpuina in District Police hotuten bul tan that a nih leh theih nan hma an la a, theihtawp chhuaha bawhzui a nih hnuah bul tan tha leh thei turin sawrkar phalna hmuh a ni. Lunglei, Lawngtlai leh Hnahthial kawng pengthuam laiah mimal in luah hawhin Hrangchalkawn Police Out Post hi bul tan that leh a ni.
He Out Post-ah hian in-charge (I/C) inspector hoin thawktu – head constable pathum, constable pathum (hmeichhe pakhat telin) leh driver pakhat an awm dawn a. Office bungraw mamawh hrang hrang chhawp a nih bakah lirthei (bolero) pakhat an kawl dawn a. Lunglei Police Station hnuaia khaw 63 awm thin atanga khaw 20 chu Hrangchalkawn OP hnuaiah hian a awm tawh dawn a ni.
Hrangchalkawn Out Post tharthawh
