Thla hnih a reh hnuah August thlaah Covid-19 a rawn inlar leh a, hri vei hriatchhuah thar an awm belh zel. Zirtawpni khan mi pasarihin an vei tih hriatchhuah a ni a, Inrinni-ah pakhat an awm leh bawk.
Tla chanve chhungin Covid-19 vei hriatchhuah mi 26 an awm ta a, Aizawl district mi vek an ni.
IDSP te’n an chhinchhiah danin, kuminah Mizoramah mi 126-in hri an vei tawh a, March thlaah mi pathum, April-ah mi 40, May-ah mi 57 hriatchhuah niin, August-ah mi 26 hriatchhuah an ni tawh.
Vanneihthlak takin kumina hri veite zingah ngaihtuahawm an awm lo tih thu dawn a ni a, natna dang vanga inenkawl lai, fimkhur thua endika hriatchhuah an ni hlawh tih thu dawn a ni bawk.
Aizawl district mi ni lote pawh hri an vei tih hi Aizawl district-a hriatchhuah an nih avangin Aizawl district tia chhinchhiah zel an ni.
Tun thlaa hri vei hriatchhuahah hian nausen an awm zeuh zeuh a, thla khat mite pawh an awm.
Nikum khan mi 40-in hri an vei a, kumina hri vei zatin a khum hneh tawh hle. Amaherawhchu, hri a hluar tihna a ni chuang lo tih chu mithiamte ngaihdan a ni a, Covid-19 vei hriatchhuah an awm zeuh zeuh tura ngaih a ni sa an ti.
IDSP te’n an chhinchhiah danin, Mizoramah sample 19,99,008 endik a ni tawh a, mi 2,39,801-in hri an vei tih hriatchhuah a ni tawh. Vanduaithlak takin mi 734-in Covid-19 vangin nunna an chan tawh a, nunna chan hmasa ber chu October ni 28, 2020-a mi niin, a hnuhnung ber chu June ni 22, 2023-a mi a ni.
Hri vei hriatchhuah belh zel
