Home minister K. Sapdanga chuan, ‘chief minister berin thawhrimnain bul a tan a, inrenchem kawngah nasa taka hma lak a ni a, sawrkar hnathawkte hlei hlei an phur a, a thiam hlei hlei an lo ni’ tiin tun hnai khan a sawi a.
Ram inrelbawlna tha leh hmasawnna tha nei tur hian ram hruaitu nge pawimawh mipui? tih zawhna hi tunhma atanga khel hlawh tak a lo ni tawh thin a.
India rama state thenkhat, hun rei tak ram inrelbawlna tha nei lo leh hma sawn thei lo anga sawi thin chu, ram hruaitu an inthlak hnuah India rama state hmasawn chak ber ber an lo ni leh thei mai tih te kan hria chauh pawh ni lovin kan hmu a. Heta tang hian, ram inrelbawlna tha leh hmasawnna chak nei tur chuan ram hruaitu pawimawhna hi a sang zawk a lo nih hi, a tih theih awm e. Ram hruaitu tha thlang chhuak thei tura mipuiin rilru dik an put a pawimawhna hi sawi nep theih erawh a ni hauh lovang.
Mizoram dinhmun bikah pawh hian, tuna home minister thusawi êng atanga a lan danah chuan, Mizoram sawrkar hnathawkte hi hruaitu azirin an awm mai a ni tih a lang thei awm e. Sawrkar kal ta zawng zawng khan, inrenchemna hi an ngaipawimawh vek a, hma pawh engemaw chenah an la vek a; mahse, tunhmaa hmalak dan kha a lo dik tawk lo thin nge, “a phur hlei hlei, a thiam hlei hlei” han tihna tur kha a awm ngai lo niin a lang.
Sawrkar hnathawkte hi an chunga thuneitute thu thua thil ti mai thin an nih avangin, hotuten ‘ti rawh u’ emaw, ‘ti suh u’ emaw an tih ang zela ti a, ti lo mai thin an ni.
Entirna ho tê pakhat han tarlang ila: Minister zin chhuak inzui duah duah thin hi, kawnglakah emaw, an thlenna khuaah emaw, a lo dawngsawngtu department hnuaia sawrkar hnathawkten, chaw ruai leh mamawh tinreng an lo buatsaihin an lo chhawpsak thin. Hetiang nikhuaa senso tur bik hi budget-ah a awm ngai lo a, mahse sawrkar sum tam tak senral a ni thin. Dik lo taka sum pawh kuala dik lo taka hman ral zirtirtu chu ram hruaitute an nih theihna lai a awm ta a ni.
Ram hruaitute hian, ‘tih tur’ emaw, ‘tih loh tur’ emaw an tih reng reng, anmahni’n an kenkawh that phawt chuan, an hnuai amite chuan zawm mai loh chu tihtur an nei lo.
Ram inrelbawlna tha leh hmasawnna dik hi ‘ram hruaitute azir zel’ a lo ni e.
Hruaitu azir zel a ni…
