HSLC result siamtha, pakuana chu raltlan

April thla tawpah HSLC result a chhuak a, mahse siamthat ngai a awm avangin tun hnaiah siamthat a ni; pakuana thar an awm a, raltlan naupang a ni.
May ni 23-ah khan MBSE-in addendum an siam a, pakuana an awm thar; Mary Sui, raltlan naupang chu pakuana a ni. Pakuana hi pahnih an awm sa a, Mary nen pathum an awm ta a ni.
Mary hi Solomon’s High School-a lut a ni a, 10-na kha mark khatin a pha lo. An zirtirtute’n mark belh that an dil a, mark hnih a hmuh belh, pakuana a ni ta a ni.
An zirtirtute chuan result hi an rinhlelh loh thu an sawi a, tihsual a awm an rin ve hrim hrim vang ni lovin, Mary Sui hi top 10-a a lan phak an beisei em avangin, mark khat chauhin a lo pha lo bawk nen, en that hi an dil ta tih an sawi.
Mary Sui hi Myanmar-a Halkha khaw mi a ni a, Aizawla Solomon’s High School-ah hian pawl 10 a kal. An khuaah hian Myanmar buai avanga hun engemaw chen sikul an kal theih loh hnuah lehkha zir zawm turin Aizawl hi a pan a ni. Lehkha hi zir tawh loh pawh a pawi ti lo a, mahse a nu leh pa thu awihin Aizawl hi a pan a ni.
Myanmar-ah kawl tawnga lehkha an zir avangin Mizo tawng hi thiam sa deuh tho mah se a ziah leh chhiar a zir chawp a, English-ah a chak lo bawk.
An zirtirtute chuan Mary hi lehkha zir taima a nih thu an sawi a, naupang thiamthei tak, ‘bright’ tak a nih thu an sawi bawk. “Naupang bright tak mai a ni a, a zir taima bawk a, thu pawh a awih a, chuvangin top 10-a a lan phak hi kan beisei ve reng a,” an school vice principal chuan a ti.
2024-ah khan Samagra Shiksha buatsaih Mathematics & Science Olympiad-ah pakhatna a ni a, MZP buatsaih Inter High School Quiz-ah pathumna a ni bawk.
An khuaah sikul a kal theih tawh dawna an hriat avangin pawl 11 zir zawm turin June ni 12 khan Halkha panin a chhuak a, sikul hi a mumal thei lo a nih chuan Aizawla zir leh a tum. Zirtirtu hna a ngaisang a, eng nge nih a tum an zawh pawhin sikul principal nih a tum thuin a chhang thin.