School Education Department buatsaih Mizoram Higher Secondary School Games vawi 20-na chu December 8 khan khar a ni a. Govt. Mizo HSS chu pakhatna an ni.
A kharna hmanpuitu School Education secretary Dr Lalzirmawia Chhangte chuan zirnain a ken tel infiamna chu zirna huangah a pawimawh a, then hran theih loh, inchawih tawka kalpui tul a nih avangin school naupangten rilru leh taksa hrisel an neih theih nan hunbi neiin infiamna neih a tul tih a sawi.
Infiamna chu team work a nih angin a huhoa infiamna atang hian school naupangten an puitlin chhoh zelnaah a huhoa hnathawh dan leh midangte nena lungrual taka thawhho dan an thiam phah a, naupangte theihna haichhuahna tangkai leh eizawnna lamah pawh hma eng an neih theihna tura kawng hawngtu a nih avangin naupang chher puitlin nan hmanraw pawimawh tak a ni tih a sawi bawk.
Ni 4 awh Higher Secondary School Games-ah hian sports discipline 6 – athletics, badminton, basketball, football, table tennis leh volleyball-ah zirlaite inelin, a pumpuiah Govt. Mizo HSS chu gold medal 9, silver 2, bronze 6, a vaiin medal 17 la in pakhatna an ni. Gold medal 3, silver 5, bronze 2 a vaia medal 10 latu Synod HSS chu pahnihna niin, pathumna Govt. GM HSS Champhai-in gold 3, silver 2 leh bronze 4 an la a ni.
Mipa Best Athlete chu Malsawmtluanga, Govt. GM.HSS Champhai niin gold 1 leh silver 1 a la a. Hmeichhe Best Athlete chu Lalpianmawii, Govt. Mamit HSS niin gold 1 leh silver 1 a la a ni. Aizawl pawn atangin zirlai leh zirtirtu 442, khawpui chhung atangin zirlai leh zirtirtu 702, an vaiin mi 1144 an tel a ni.
HSS Games vawi 20-na zo
