Hulhliap batch 1-naah 150 chuang
Mizoram sawrkar, Mizoram Synod leh tlawmngai pawl tangho buatsaih ruihhlo ngaite enkawl bul tanna, Hulhliap Short Stay Centre chu Synod Revival Camping Centre Neihbawih Sihphirah Thawhtanni khan tan a ni.
Central YMA kaihhruaiin Central YMA office Tuikhuahthlang leh Bawngkawn YMA Hall atangin bus-in Hulhliap Short Stay Centre a awm duh hi phurh chhoh an ni a. Batch 1-na atan mi 150 chuang lak phawt an ni.
Pathian hnena hlanna programme Synod Revival Department director Rev JC Lalramliana kaihhruaiin hman a ni a, Hulhliap Core Committee member secretary, Social Welfare director Dr Lalhriatzuali Ralte in Hulhliap din tura hma lak dan a sawi a. Core Committee chairman Malsawmzuala Ralte chuan tawngtaina a let khata tipung turin mipui a sawm.
Social Welfare minister Lalrinpuii chuan kohhran leh tlawmngai pawl chungah lawmthu a sawi a. “Hulhliap Short Stay Centre hi kan unau ruihhlo bawiha tang mekten nun thar an neihna hmun a nih ngei theihna turin tawngtaina lamah kan hriat a pawimawh a ni,” a ti.
Synod executive secretary Rev Dr K Lallawmzuala’n Pathian hnenah hlanin, hun hman tihtawp a ni.
Hulhliap batch 1-naah 150 chuang
