Hulhliap thawh hnihnaah
ruihhlo ngai 500+ an lut
Ruihhlo ngaite chhanchhuahna atana buatsaih Hulhliap Short Stay Centre thawhhnihna chu Thawhtanni atang khan tan a ni a, tum khata mi 150 vel zel awm tura ruahman a nih laiin, tun tumah hian mi 550 vel an lut.
Hulhliap Core Committee hotute sawi danin, a thawhnihnaa lut zingah hian Aizawl chhung bakah Aizawl district pawn atangin mi thahnem tak an lut tel. Ruahman dan chuan batch tinah hian mi 150 zel enkawl tura tih a nih laiin, Hulhliap thawhhnihnaa lut tur inziaklut hi July 21 tlai dar 5.30 vel thleng khan mi 550 an ni tawh.
A thawh khatnaah khan a tirah mi 250 vel camp-ah an lut a, awm tluan erawh mi 119 an ni.
Hulhliap SSC thawhhnihna hi July 21 atanga August 9, ni 20 chhung kalpui tum a ni a. Camper-te hi July 30 thleng an taksa in ruihhlo a mamamawhna zualpui phuhruk thei turin damdawi lam thiamna hmangin enkawl an ni anga, July 30 atanga August 3 thleng rilru lam enkawl thiamten counselling an neihpui ang. Hemi hnu hian Synod Revival hnuaia Gospel Team-in August 9 thleng gospel camping an neihpui dawn a ni.
Hulhliap SSC thawh hnihna hi ruihhlo ngai mipa tan bika buatsaih a ni a, batch dangah chuan zu avanga buai leh ruihhlo ngai hmeichhia enkawl zel tum a ni.
Hulhliap thawh hnihnaahruihhlo ngai 500+ an lut
