Sawrkar hnathawkten hun vawn dik chungchangah sawrkar duh dan an ngaipawimawh ta tih Home minister K Sapdanga chuan a sawi a. Mahni thawhna tur hmun ni loa thawk sawrkar hnathawk tam tak awm chu model code of conduct hlih hnu ah chinfel a ni dawn tih a sawi.Department of Personnel & Administrative Reforms minister ni bawk K Sapdanga chuan sawrkar hnathawkten sawrkar rilru hria in, inrenchem kawngah thahnem ngai ber bera an tan bakah sawrkarin hun vawndik a duh tih hria in, thupek chhuah hran ngai loin hunbi dika office thlen tumin an phe suau suau a, office laklawh laia pawihawia office chhuahsan pawh an awm tawh mang loa, ban hun thlengin dawr tur an awm thup tih a sawi.
“Directorate lam pawh hun vawndik dan enfiah mek a ni a, hmun thenkhatah inhrilh ngai a la awm e tih loah chuan, a tam zawk chuan sawrkar duh dan an ngaipawimawh hlein kan hria,” a ti.
Mizoramah aikal mi 3365 an awm a, sawrkar mi ni si lo, sawrkar thu leh hla hre tur leh thawk tura rawih an ni a, thil tisual pawh nise sawrkar mi an nih miau loh avangin hrem ngaihna awm loa, an duh hun hunah confidential work an bih thei a, a pawi takzet, tiin minister hian a sawi a. Mahni thawhna tur hmun niloa thawk (attach) 4000 vel chu model code of conduct zawh hunah chinfel an ni dawn tih a sawi bawk.
Sawrkar hnathawkten a hun dik taka hlawh an lak chu phu in an hria a. Pay day pawh ni 15 atangin thlatir lamah an sawn hnai hret hret thei a, reiloteah a dan tur dik takin thla tawp ni emaw, thla thar ni emaw ah hlawh an lak leh theihna turin sawrkar a tang fat fat tih a sawi.
Leiba, pek loha pawi thei, chhungkaw tam takin an manganpui mek chu sawrkar thar chuan a rul zung zung a, thla li chhungin a zualpui chu a rul zo thei tih sawiin, “Heng leiba rulhna sum hi van atanga lo tla a ni ngawt lo a, finance enkawltu chief minister thawhrimna Pathianin mal a sawm kan ti mai,” a ti.
Pawn lam atanga an lo hriat dan, ‘state sawrkar hian sum a dawng tlem lo, a hmanna lam kan uluk lo em a ni,’ tih thin chu an lo sawi sual lem lo tih an finfiahin a hria tih K Sapdanga hian a sawi. SASCI sum, ADB atanga sum puk chu Covid leng vanga state-in a dawn, Special Assistance to State for Capital Investment (ro tling tham siamna atana state hnena a bik taka duhsakna pek) a ni a, thil nawi te teah hman a nih loh nan project pakhat chu nuai 200 man aiin a te tur a ni lo, tih a nih laiin, pawhsawm a ni a, contractor pakhat hnenah nuai 200 aia tam pe in, chu chu MLA-ten hmun 40-ah te an phel darh a, unit induhsak nan, vote zawn nan an ser darh ta vak a, capital investment atana sum pek an hmanna chu capital investment tling a vang hle, tiin a sawi.
“Chutiang thoin NABARD atanga sum puk pawh kan hmanral dan hi chhui thiamte kuta dah a la tul maithei,” a ti.
April thla tira rial leh thlipuiin min nuai hma khan, sawrkar laipui atanga disaster management lama sum hman tur an dawng vek hman a, chhiat tawkte puihna tur an pechhuak nghal thei tih DM&R minister K Sapdanga hian a sawi a. DC-te MP inthlan lamah an lo buai deuh avangin la sem chhuak kim hman lo an awm tih a sawi.
Hun vawndik ngaipawimawh tan Attach-a awmte chinfel la ni ang – Home minister
