Hursualna lam hawi naupang kum tling lo video emaw thlalak emaw thehdarh lo turin Mizoram State Commission for Protection of Child Rights (MSCPCR) chuan mipui a chah.
MSCPCR thuchhuak chuan tunhnaiah social media hmangin naupang kum tling lo video mawi lo tak thehdarh a ni, tiin, he video thehdarhtute dan anga hrem an nih theih nan Commission chuan a theih ang angin a ngaihven a. Mizoram Police Cyber Crime leh District Child Protection Unit (DCPU) ten rang taka hma la in, dan anga pawikhawihtute hrem an nih theihna tura an hnathawh leh hma an lakna chu lawmawm a tih thu a sawi.
‘Section 67B of Information Technology (IT) Act 2000 leh Section 13, 14 of the Protection of Children from Sexual Offences (POCSO) Act 2012 chuan hursualna kaihhnawiha naupang telna video leh thlalak thehdarhtute chu lung in tang tur leh sum chawi tura hrem theih an ni, a ti a. Internet leh social media hman kawngah nu leh pa ten kan fate ngaihvena fimkhur pui a tul takzet a. Naupangte pawhin internet hmansual chungchangah danin an chungah thununna a lekkawh thei a ni tih an hriat a tul hle,’ a ti.
Hursualna lama naupang telna video thehdarh lo turin chah
