Hydel project outsource tum hi hluihlawn tho ngai tur chi an ni
– P&E minister
Mizoram sawrkarin small hydel project outsource a tum ho chu, outsource an nih loh chuan enkawl zel a hautak avanga hluihlawn ngai tho tur chi an ni a, outsource a nih chuan sawrkarin hlawkna a la nei thei zawk dawn tih Power & Electricity minister F Rodingliana chuan a sawi.
Thawhtannia ZPM party inkhawmah F Rodingliana chuan, Mizorama hydel project 23 siam tawh zingah 11 chu chhan hrang hrang vangin hluihlawn a ni tawh a. Project 7 chu outsource tura tender niin, heng zinga project pathum chu kum rei tak ‘run’ loha awm tawh an ni tih a sawi.
Hetih lai hian project tha tak tak – Khawiva 1.05 Mw, Teirei 3 Mw, Kau Tlangbung 3 Mw, Kawlbem 4 Mw erawh department-in a la enkawl zui dawn tih a sawi a ni.
“Tuna SHP outsource tur hi department chuan Mizoram tan hlawk hle turah a ngai a. Outsource lo ta ila, tun dinhmun anga kan enkawl hi chuan, a hma anga hluihlawn leh vek mai a hlauhawm a ni,” minister hian a ti.
ZPM sawrkar tirh khan, Serlui ‘B’ HP chu cheithat dan ngaihtuahin Special Investigation Team an din a, a hmuna an enfiahna report-ah, khawl leh assets hrang hrang hi cheithat a ngai hle tawh a, senso ngai an chhutin cheng vaibelchhe 37-40 inkar vel a ngaih dawn bakah kum hnih leh a chanve chhung khawl hi tihnun theih a ni dawn lo a. A sum sen leh a enkawl zuina ngaihtuahin, sawrkar sum dinhmun nen kawng dang ngaihtuah mai ni se an ti ta tih a sawi.
“Serlui B hi a tir atang khan a rualin khawl pathum hi vawikhat mah a la run lo. Tunah hian khawl pakhat hi part hrang hrang pawtkhawmin kan run ngawr ngawr a, hemi a chhiat hunah phei chuan tihngaihna a vang ang,” a ti.
Small hydel project outsource chungchangah data dik tawk lo hmanga mipui hruaikawi thei tura thuchhuah a awm tih P&E minister hian sawiin, kum 10 chhunga a thar chhuah kha Rs. 5.83 an puntir ringawt nia lan thu a sawi.
Serlui ‘B’ project chu NABARD loan hmanga siam, tunah loan rulhna nen a vaiin cheng vbch. 245 chuang hman a nih bakah a enkawlna senso zawng zawng tun thlengin vbch. 318 chuang a ni a. Sawrkarin unit khat siam chhuak tura a senso chu Rs. 8.37 niin, tuna an leina rate Rs. 5.83 nena sawrkar hloh chhutin a inthlauhna chu unit khatah Rs. 2.54 zel a hloh zawk tih a sawi a. Serlui ‘B’ enkawl tur hian EE atanga PE thleng mi 84 awmin kum 2023- 2024 chhung ringawt khan hlawh atan nuai 326.37 sen niin O&M-ah sum engemawzat sen a la ni bawk tih a sawi a ni.
Hetiang hi Tlawva HP-ah pawh a ni tho tih F Rodingliana hian a sawi a. Heng hydel project pahnih atang hian a thlawnin power hmuh let theih a nih dawn bakah enkawlna atana sum sen a ngai tawh dawn loa, an outsource thei a nih chuan heng project pahnih atang ringawt pawh hian thawktu mi 100 chuang project thar khawih turin an hmang tangkai thei dawn tih a sawi bawk.
“Tuna kan dinhmun atang chuan, kan project hi a maintenance leh thawktute hlawh kumtin a pun zel avangin enkawl zui hi thil hlawk ber a ni loa, sawrkar tan chuan tuna kan thutlukna anga kal hi a tha ber. Midang hnena hralh chhawng tur kan ni loa, kum 25 chhung atan keinin a hlawkna telin midang kan enkawl hawh tir dawn a ni zawk,” a ti.
Hydel project outsource tum hi hluihlawn tho ngai tur chi an ni – P&E minister
