Sawrkar hmasa hunlaia hydel project siam tura company ho inremna an ziahpui tawh chu state kuta hlan har dawn em avangin an sut (cancel) leh tih Power & Electricity minister F Rodingliana chuan a sawi.
Assembly Session-a zawhna chhangin P&E minister chuan, hydel project siam tumin sawrkar hmasa in company engemawzat inremna a ziahpui a, an MoU an zirchiannaah a time limit a awm lutuk loa, a thenah chuan kum 99 ang chi te a ni a, hei hi tha an tih vak loh avangin engemawzat chu hma lak zui loh tura cancel a ni tih a sawi.
Khaw chhiat apianga Mizoram chhimlama electric current thim ziah chu a buaithlak hle a, Hnahthial atanga 132 kV line buaipui mek a ni a, sum harsatna avangin chak taka hmalak theih a ni lo, tiin a sawi. Megawatt 460 pechhuak thei tur Chhimtuipui khuah tuma NEEPCO nen inremna ziah chu tum anga a kal loh avangin cancel a ni a, a aia te leh samkhai zawka hma lak tum mek a ni tih a sawi.
Tunah hian Tuivai Hydro Eelectric Project (150MW, Ngopa bul), Tlawng HEP (120MW, Lungleng khaw bul) leh Tuirini HEP (24MW, Sesawng bul) te chu thawh a nih theih nan hma lak mek a ni tih F Rodingliana hian sawiin, “Hma lak tumna hmasa ber hi sawi mai theih a ni lo a. Hydel project siam tura thil tul pawimawh hrang hrang leh a thawhna tur sum hmuh hmasak apiang thawh nghal zel a ni ang,” a ti.
Hydel project siam tura inremna ziah tawh sut leh
