I ‘ex’-in ngaihzawng dang a neihin engtin nge i tih ang?

I ‘ex’-in ngaihzawng dang a neihin engtin nge i tih ang?
In then tawh hnuah pawh kan ngaihzawng/kawppui hluite hi rilruah eng emawti takin an cham ve lo thei lo a, chutiang boruakah chuan kan ‘ex’ ten mithar an tawng a, ngaihzawng dang an nei leh ta tih hriat te hian eng emaw boruak deuh chu a la awm ve thin. In pahnih inkarah eng boruak mah awm tawh lo mah se, chutianga midang nen an inkawp leh ta mai chuan engtin emaw tak a nghawng ve dat che a, lawmpui viau chu a har thin. Ani nena inkawp leh duhna lam pawh ni chuang loin, thik ve deuhna emaw, khawhar deuh riauna emaw te pawh neih ve theih a ni. Hun kaltawh te chhui kirin, in inthen chhan te i ngaihtuah kir a, han text ve leh zeuh chakna te pawh i neih phah hial mai thei. Hetiang boruak hi i tawng a nih chuan a tihdan tha ni a relationship lama mithiam te sawi hi chhiar rawh le.
I ‘ex’ nen khan inla inkawmngeih deuh tho em? Social media-ah te inla inbe fo em? |hian intawm, a chanchin i hriatzui reng theihna te i nei em? Inthen hnua i tih tur hmasa ber chu in inzawmna zawng zawng chhutchah nghal vek a ni. Ani chu i hriatchhuah fo theihna eng emaw inzawmna i la kawl chhung chuan hmalam pana, ani chu theihnghilh a tiharsa ang a, nitin i hriatchhuah phah ang. A hmangaihna zinkawng zawh zui tak phei chu i hriat chak loh leh i hriat atana tul lo tak a ni. I tan awmzia a nei tawh lo.
I ‘ex’-in ngaihzawng thar a nei tih i hriat khan engtin nge i awm tih nangmah lo in enchhian teh. I thinri deuh em? I lungngai deuh em? I thik deuh em? Hetiang hian i awm a nih chuan ngaihsak loh tum mah la hrehawm i ti tho ang, chuai chuan eng nge i lo lunngaih a, i thinrim a, i la thik deuh tlatna chhan kha hriatchhuah tum zawk la, i thiantha hnenah sawi chhuah te pawh a pawi lo.
Engtin nge i tih tak ang? A ngaihzawng thara nena lo inkhaikhin te khan awmzia a nei lo a, social media lamah a chanchin lo ngaihven ruk te pawh a tul lo va, atana tling ve tawk lo va inngaihna lo neih te pawh a tul lo ve, eng vanga inthen nge in nih tih kha ngaihtuah zawk rawh. Ani i thenna chhan kha ngaihtuah la, amaha i duh loh leh tha lo i tih te kha ngaihtuah zawk la, inthen chu i tana tha zawk tur a nih beiseina nei ang che.
Ngaihzawng/kawppui te nena inthen hnuah lunglen chang neih te chu thil nihphung lo a ni bik lo. Mahse, he hun hu mahni nuamtih zawng tih nana hmanthiam a tha. Eng nge i tui zawng leh nuam tih zawng tih te ngaihtuah la, chutiang atan chuan hun thawl zawk i nei tawh alawm. I thian hlui te pawh tlawh chhuak leh la, i tih chak thin, mahse, i ngaihzawng/kawppui neih avanga i tih theih loh te kha tihna remchanah hmang rawh. Tichuan, khawvelah hian ngaihzawng neih ringawt ni lo ni hlimna tam tak a awm tih i hrechhuak ang.
Inthen avanga rilru natna hian hmangaihna awmzia te, nun awmzia leh inlaichinna awmzia te min zirtir a, he i thil tawn atang hian inzirthiam tum ang che. I ngaihzawng neih leh hunah eng nge tih a, eng nge tih loh tur tih te inzir fin nan hman tum zawk la, inngaihzawnnaah engtia hmasawn tur nge i nih tih te inhriatchhuah theih nan hmang ang che.
Tute mah hi ngaihzawng/ kawppui te then tuk atanga theihnghilh nghal hmak thei an awm lo tih hriat reng tur a ni a, chuvangin nun phung pangngai nei leh tur chuan hun a duh ve deuh tih te pawh hriat tur. Dawhtheih a pawimawh a, mahni innawr nasat lutuk tur a ni lo. I buai theihna turin thil chi hrang hrang ruahman la, thian thar kawm la, i rilru lak penna tur i ngaihtuah thiam zawh poh leh i tan a tha dawn.
I ‘ex’ nen khan in intihsiak lo tih hriat tur a ni a, ngaihzawng thar a chhar leh ta a nih pawhin nang aiin a thei zawk emaw, a che tha zawk emaw tihna a ni chuang lo. Ama nun a ni a, a mimal nun chu a duh danin lo kalpui ve mai rawh se, chu chuan i nun nghawng buai tir duh chuang suh.