I kawppui kha hmeichhia nen lo flirt ta se?

I kawppui kha hmeichhia nen lo flirt ta se?
I pasal emaw i bialpa emaw kha hmeichhe dang nen lo inbe tha deuh se engtin nge i tih ang? Hetiang dinhmuna din hi a buaithlak duh khawp mai. Thik chiam dawna ni chiah mang si lo, thik loh dawna thik rilru deuh tho si boruak hi a awm ve a.
Eng emaw tihkhawmnaah in kal dun a, tah chuan i kawppui chu hmeichhe pakhatin a ngaihven riau mai a, engtin nge i tih ang?
A) Chawp leh chilhin i ri nghal thak ang. Ani chu i kawppui a ni tih i hriattir nghal hmiah ang.
B) I nui mai ang a, nakin, in pahniha inawm dun hunah i kawppui chu i zilh hlak ang.
C) I kawppui chu i lungawi lo tih hriattir nan i melh deuh hrâwk ang.
I chhanna chu a pathum zinga pakhat tal hi a nih chuan a tha viau e.
Hetiang boruak hi America President hlui Barack Obama nupui Michelle Obama meuh pawhin a tawng ve tawh a nia. A pasal a President lai khan tum khat chuJohannesburg-ah Nelson Mandela memorial service-ah an Michelle chu a pasal President Barack Obama nen an tel dun a, thla an la chuai chuai, chutah Obama leh Denmark Prime Minister hmelchhe lo fahran mai Helle Thorning-Schmidt te chu a hma lawkin an lo nui dun deuh bâwk bâwk a, thla an han la tan deuh chiah chu Obama leh Helle ding dun chu Michele ngaihdan a ni ta vak lo, a dinna sawnin, Obama leh Helle inkarah a va ding ta siah mai a ni.
Television producer Raksha Shetty chuan hetiang hun hi tawng ve ta se chuan, “Ka bula awm a nuam zawk a a hlimawm zawk tih ka hriattir ang. Kha thil thleng leh a hmeichhia kha ngaihven teh chiam a tul lo. An lo flirt ve satliah ni a i hriat chuan ngawihsan mai la, a reh ve mai ang. A pawimawh ber chu nang kha i tha zawk tih hriattir hi a ni,” a ti.
Marketing executive Sitara Sharma chuan, “Mipain a nupui mipa dangin an bekbawr deuh reng lai hmu se ngawi rengin a thlir liam mai mai thei dawn em ni. Chutiang chiah chu a ni ve mai,” a ti ve thung.
Hetiang hunah hian engtih nge tha ber ang tih chu sawi theih a ni lo va, kan boruak tawn a zir zela chetdan thiam a pawimawh ang.