Congress ten Feburary 16-a an bank accounts pali khawih chet theih loha income tax (I-T) department-in an dahsak an tih hnuah income tax appellate tribunal (ITAT) te chuan Congress te bank accounts chu khawih danglam rih lo turin hriattirna a pe nghal.
Congress tena an zualkona chu karleh Nilainiah ngaihtuah a ni dawn a ni.
Congress Treasurer Ajay Maken chuan media mite hnenah Indian National Congress bank account pali leh Indian Youth Congress bank account te chu I-T department ten khawihchet theih loha an dahsak thu a sawi a.
Maken chuan hetia account dahna chhan hi kum 2018-19 a I-T return filing ni 45-a an tlai vang tiin a sawi.
“Congress account khawih chet theih loha dah a ni lo, democracy che thei lova siamna a ni. Inthlanpui neih hun thla rei lo te chauh a nih tawh laiin Opposition party lian ber account khawih chet theihlohin an dah duh a nia,” tiin New Delhi-a press conference neihnaah a sawi a. “Kan ramah hian party pakhat chauh rorelna a awm dawn em ni?” tiin zawhna a siam bawk.
Rajya Sabha member leh senior Advocate Vivek Tankha chuan ITAT ah zualko nghalin account chu kharsak lo tur leh karleh Nilaini-ah ngaihtuah tur an ti zui ta a ni. Tribunal chuan Rs 115 crore chu dahkham anga dah tur leh chu aia tam chu party-in an hmang thei rih lovang a ti bawk.
Income tax department chuan party atangin Rs 210 crore pe tura an phut thu sawiin Maken chuan kum 2019 December 31 khan kum 2018-19 I-T returns an file tur chu ni 40-45 velin an tlai thu a sawi bawk a.
I-T department in party account khawihchet theih loha an dah chu ‘democracy beihna’ tiin Congress president Mallikarjun Kharge chuan a sawi a. Judiciary chu multi-party system humhima ‘india democracy hum’ turin a ngen bawk a.
“Thuneihna atchilh Modi sorkar hian Opposition pary lian ber Indian National Congress account chu Lok Sabha inthlan hma lawkah khawihchet theih lohin a dah a ni. Hei hi India democracy na taka beihna a ni a. Constitution kalha BJP tena sum an lakkhawm te chu inthlanah an hmang ang a, kei nina crowdfunding hmanga kan sum hmuh te chu kharsak kan ni thung a ni,” tiin Kharge chuan a sawi bawk a.
“Hei vang hian a nia, nakin zelah chuan inthlanna a awm lovang ka tih reng ni. He autocracy hi kawtthlerah te chhuakin na takin kan bei let ang,” tiin Congress chief chuan a sawi.
I-T ten INC account freeze sak
