IAS tawi ber hmeichhia chu

K. Hmingthankaia
Mi tam takte hriat hnu mah ni se, keimah anga la hre ve lote tan leh, tu te emaw tan fuihtu tangkai tak te a lo nih theih tak hlauhin, a chanchin ka hriat tlemte chu famkim lo takin ka’n sawi ve mai mai ang e.
Sipai Colonel Rajendra Dogra leh Sikul Principal Kumkum Dogra-i te fanu, an fa neih chhun Arti Dogra-i hi kum 1979 July thla khan Uttarakhand state-a khaw mawi leh nuam tak Dehradun-ah a lo piang a. A tet lai atangin a danglam deuh tawh a, a rualpuite an than chhoh mek laiin ani chu feet thum leh a chanve (3.5ft.) ah chuan a than a tawp ta tlat mai a ni. Mite chuan mak leh nuihzat enin en mah sela, nu leh pa rilru paukhauh tak a nei tlat.
A nu leh pate chuan enhrang ve hauh lovin, naupang dangte ang thoa lehkha zir fat fata, infiam a hun pawha infiam ve bawrh bawrh tur leh, mahse, tum ram leh nih tum neia mitthla tlat turin an fuih sauh sauh thin a ni.
Arti-i hi lehkha thiam thei tak a ni a, Dehradun atangin school a kal chhuaka, Delhi University atanga graduate-in, master degree te a thleng ta zel a.
Mahse, Arti-i chuan lehkhathiam nih ringawt chu a tum hauh lo, hna thawh a tum a ni. Pawn lam lan dan atang ringawta intehna khawvel hi a dik lohzia khawvel hi hmuhtir a tum tlat. Chhung lam hi a pawimawh ber a, chhung lam atang hian engkim a tih theih a ni tih hi khawvel hriattir a tum tlat a ni.
Arti-i chuan India rama exam harsa ber mai UPSC exam lam chu a hawi ta tlat mai le. Engtin tak chuan ni dawn maw le? Miten IAS pawh lo ni hlauh mah sela, a mawhphurhna leh a duty chu engtin nge hetiang ang ruangam nei hian a tlin tehlul ang ni? Engtin ge rorelna a kenkawh theih tehlul ang, an tih chu dawtah a chantir dawn tih reng an hre lo.
A vawikhat nan kum 2005 chuan Arti-i chuan UPSC exam chu a hmachhawn ve ta ran mai le..Result lo chhuah hunah engtin tak ni ang maw..Mite nuihza siamna mai mai tura ngaih a final result chu a lo chhuak ta ngei mai le. Chhei le chhei le. Hmeichhe rualbanlo, miten khutah, hniam taka an en Arti Dogra-i chu khitah khitah, sang takah, All India Rank(AIR) an tih zingah telin, a sang a sang, a sing a sing tel exam zingah chuan 56-na a ni ta vang mai le.. India ram mihring tam lutukin vawi tam tak an beih nawn pawha an hlawhchham thinnaah chuan, Arti-i chu a vawikhatnaah a hlawhtling nghal ta tlat mai. Fiamthu leh dawt leh mumang ram lah chu a ni der si lo. Amah pawhin a awih thei lo, a result chu vawi tam a fiah nawn, mahse, a tak tak a lo ni zel si.Tu mahin fiamthu lah chu an thawh hek lo. Khawvel hian chhunglam thil tihtheihna chu a va hmu chiang kher em.
Tichuan, Arti Dogra-i chu IAS Officer, Rajasthan cadre a ni ta. Mihringte hian engemaw avanga ti thei ve dawn lo, ni ve thei dawn lo nia inhriat tlatna, midang nena kan inkar danglamna bang daidanna awm tlata hriatna chu Arti-i hian a rawn thiat mai ni lovin, a rap sawm ta vek a ni.
Kum 2006-ah Rajasthan-a Bundhi District Collector leh Magistrate (DC) hna chu thawk tanin, Bikaner leh Ajmer District-ahte a thawk zel a. Chumi hnuah Jodhpur Vidyut Vitratan Nigam Limited Managing Director hna a chelh leh a.
Arti-i hian hna a thiam em avangin Rajasthan sawrkar chuan akul ataiah a chhawr a ni ber. Chief Minister Ashok Gehlot-a Joint Secretary a nih hnuin Special Secretary a ni chho leh ta a ni. Arti-i hian vantlang mipuite that tlanna tur policy leh project tha tak tak a duang chhuak thin a ni.
Arti-i hian nihna hrang hrang a chelh tel thin a. Hmeichhe hmasa ber atan Jodhpur Discom. Managing Director pawh a ni tawh a ni.
Arti-i hian National leh State Award engemaw zat a dawng tawh a. District Election Officer a nihna anga Ajmer Assembly election-a a chet that em avangin, kum 2019 khan India President Ram Nath Govind-a hnen atangin Award pawh a lo dawng tawh a ni.
Arti-i hian rualbanlo-ten an dikna chanvo hlena, vote thlak theuh tura a beih nasat avangin, ‘Doughters are Precious’ Award pawh a dawng a. Tin, Bikaner district chu ualau taka inthiar awm lohna, open defecation free society a nih theihna turin, ‘Banko Bikano’ dinin a bei chiam bawk a. Anaemia, thisen tlakchham natna laka him nan, ‘Mission against Anaemia’ te a din a. Hmeichhiate hriselna leh an dam khawchhuahna turin, ‘Maa’ scheme hmang te pawhin hma a la nasa a ni. Hengte avang hian chawimawina a dawng nasa a ni.
Tun, he thu ka ziah laia Arti-i hna chelh lai mek chu- Secretary to the Department of Transport, Information, Technology & Communication, Gov’t of Rajasthan a ni.
Tunah chuan hmeichhia, pianphunga rualban lo, fit thum leh a chanve chauha sang Arti Dogra-i atang hian mi tam takin zir tur leh entawn tur an hmu tawh a. Miten amah an hmuhin a taksa pianhmang, a tetna an hmu tawh lova, a hmela ropuina, thil tihtheihna, tum ruhna leh zahawmna chu an hmu hmasa ber zel tawh a ni.
Tu tan pawh thil tih tum leh nih tum, suangtuahna leh mitthla lian lua leh phuloh hi a lo awm miah lova, chhung lam atanga tumna tak tak a awm phawt chuan eng pawh hi a lo tih theih a ni tih hi Arti Dogra-i atang hian khawvelin a lo hre thei ta a ni.