Mizorama rawn kal Ministry of Information & Broadcasting director general (NE Zone) K Satish Nambudiripad chuan Ningani khan larsap leh chief minister a kawm.
Larsap Dr Hari Babu Kambhampati chuan Mizorama mipui nawlpuiin centrally sponsored scheme, social security scheme leh welfare scheme tam zawk an hre miah lo chu a vei thu a sawi a. Mipui nawlpui chu sawi loh, mithiam zawk leh khawtlang hruaitute bakah sawrkar hnathawk vengva tura ngaihte pawhin an hre fumfe lo niin a sawi.
Sawrkar laipui hnuaia scheme tha tak tak, department hnuaia pek chhuah chi, welfare scheme tha tak tak leh zankhat mitchhin tawh thulha chhungte tana sum hmuh theihna tur, inziahluh leh kumtina sum tlemte bak thawh ngai lo tam tak a awm tih sawiin, “Hei hi mipui hian an zawm duh loa, an dawng duh lo tihna lam niloin an hriat loh vang a ni. Hriattir tur hian bank hnathawkte leh sawrkar hnathawkte an inpek tawk erawh a ngai a. Department thenkhatah chuan an officer-ten central schemes atanga department hnuaia beneficiary-te hnena an pek theih chungchang hre lo an la awm a ni,” a ti.
Nasa zawka awareness campaign pek chu hmalakna pawimawh a ni, tiin, hemi kawngah hian sawrkar laipui media agency – PIB leh a thawhpui DDK leh AIR chu tan an lak a ngai tih a sawi a ni.
Chief minister Lalduhoma chuan Ministry of I&B-in Mizorama hma a lakna tinrengah a tul anga tanpui turin an inpeih reng tih a lo hrilh a ni.
I&B hotu in larsap leh CM hmu
