ICC chairman thar tur Shah

ICC chairman thar tur Shah
Prime minister Narendra Modi-a fapa chuam an tih mai, Gujarat tlangval, India sumdawng hausa Jay Shah chu a pa union home minister Amit Shah leh BJP sawrkar avang pawhin khawvel zah a kai pha a, International Cricket Council (ICC) chairman thar tur thlannaah pawh chuhtu nei loin a tling zawk mai!
Kum 35 mi hian kumin December ni 1 khian New Zealander Greg Barclay thlakin a post thar a luah dawn a, tah chuan khawvel huapa cricket thuneitu sang ber ICC chairman naupangber a ni tawh ang.
Kum 2019 atang khan Board of Control for Cricket in India (BCCI) secretary a la ni chho ta ngar ngar a, Barclay-a’n a tum thumna atana chairman seat chuh a tum tawh loh thu a puan hnuah Shah chiah hi chairman thar atana candidate awmchhun niin, chuhtu nei loin a tling ta a ni.
Election ahmachhawn vuakvetah Shah hian a tum ber chu tun hma zawng aia cricket chawilar leh khawvela hmun lailum zawk luahtir a nih thu a sawi.
2028 Los Angeles Games-ah hian kum 128 hnua a vawikhatna atan Olympic-ah cricket an telh leh dawn a, he mi chungchang hi Asian Cricket Council president ni bawk Shah chuan sawichhuak telin, Olympic-a cricket kirleh tur chu he game than zelna tura pawimawh lutuk niin a tarlang.
ICC chairman a ni tur hian khawvel cricket-a India huhang leh thuneihna pawh a sang sawt dawn a, Gujarat tlangval hian khawvel huapah engtiang taka thiltithei nge a nih tarchhuah theihna hun remchang a nei bawk ang.
Cricket hi a che ve reng a, khawvelah ha game buaipui ram hi an tam loh avangin game thi mek tia sawi pawlte pawh an awm a, a bik takin hun rei tak awh Test cricket phei chuan hmalam pan aiin kalsan a hlawh niin a lang a, international game tia sawi theih ni ve bawk mah se fanchise league-te paw’n an vau ve reng a ni.
Cricket khelh dan (fotmat) rei ber Test cricket-in hniam lam a pan zel avangin ODI ai pawha khelh hun chhung la rei lo zawk Twenty20 an tih chu tunlaia cricket khelh dan lar ber a rawn ni chho ta a; he boruakah hian India tlangval Shah hi India leilunga Test cricket chawisang (promote)-tu niin, tunhnai khan Test cricket khel India player-te hnenah hlawh (cash incentive) tam zawk a tiam a, ICC member-te pawhin khawvela cricket than zelna atan an awt a, chuhtu awm loin an thlang tling ta ni berin a lang.
Khawvel huapa Test cricket humhim turin Ajay Shah hian engtin chiah nge ruahmanna a siam hriat a la ni lo a, khawvel huap pawha sport governing body chak lo berte zinga mi ICC kaltlang hian Test cricket chuai mek a chawinung zo dawn em kan thlir ang a, Taliban-in rorelna an chan hnua ICC-in Afghanistan women’s team a hawisan tawh laka a chet lak dan tur pawh cricket khawvel ngaihven mek zingah a tel ang!