ICG hnenah lawng thar, ICGS Akshar hlan
India-a sorkar hnuaia ralthuam siamtu lian ber zinga mi, Goa Shipyard Limited (GSL) chuan Nilaini khan Indian Coast Guard (ICG) hnenah lawng thar, ICGS Akshar (Yard 1276) an hlan.
He lawng hi sorkar laipuiin mahni kea din a kalpui meka India-in Fast Patrol Vessel (FPV) pariat a siam chhuah tur zinga a pahnihna a ni.
ICG hnena hlanna inkhawmah hian Brajesh Kumar Upadhyay, Chairman & Managing Director; RAdm Nelson D’Souza, NM, IN (Retd), Director (Operations); DIG V.K. Parmar, PD (MAT) leh Commandant (JG) Subhendu Chakraborty, Commanding Officer, ICGS Akshar leh ICG-a hotu lawkte an tel.
ICGS Akshar hi India-in mahni kea din a tumna leh technology-a thil thar a chin chhuah tumna kal zela siam chhuah a ni a. Metre 51.43-a sei, metre riata zau niin tonne 330-a rit a ni a. Marine diesel engine pahnih hmang, controllable pitch propeller (CPP) hmanga khalh niin FPV-ah chuan a hmang hmasa ber niin thunun leh khalh velah a hmaa mite aiin a changkang zawk a ni.
Knot 27-a chaka tlan thei leh tuipui mel 1,500 thleng kal thei a ni a, thununna khawl changkang ber bera thuam, hman awlsam leh daih rei tur bel a ni.
Officer paruk leh sailor 35-in an enkawl tur a ni a, a lawng hi sanghal mantute venhimna atana hman tura duan niin Exclusive Economic Zone (EEZ) thlithlai nan, tuipui kam thlithlai nan, phal loh tawlhte dan nan, lawng suam thinte ven nan bakah mi zawn leh chhanchhuah hna thawh nana hman theih a ni.
ICGS Akshar hian India tuipui kam vengtu sipaite chu nasa taka a tihchak beisei a ni a, a him phah sawt pawh rin a ni.
Sipaite kuta ICGS Akshar hlan hian India-in tuipuia himna a ngaih pawimawhzia a tilang tih ICG chuan a sawi a, Make in India hnuaiah ram venhimna thilte ram chhung ngeia siam a ngaih pawimawhzia a tilang bawk niin an sawi.
India hi khawvela lawng sakah hmahruaitu a ni mek zel a, GSL hian ram venhimna atana hman chi ama kutkawiha siam te, technology thar hman leh ram danga hralha sum dinhmun tihthat theihna ang chi a dap reng a ni.
ICG hnenah lawng thar, ICGS Akshar hlan
