IGNOU pro vice chancellor Dr Kiran Hazarika chuan Zirtawpni khan Raj Bhavan-ah larsap Dr Hari Babu Kambhampati a hmu.
Larsap hnenah hian IGNOU building thar, Aizawl Regional Centre chu hawn a nih thu a hrilh a. IGNOU hnuaia hmalakna thar kalpui tum mek, Mizorama zirlaite tana skill lam leh thil tangkai tak tak zirna buatsaih turte a sawi. Mizorama IGNOU Study Centre hrang hrangah Hindi tawng zirtirna kalpui tum a nih thu sawiin, larsap thlawpna a ngen nghal a ni.
Hindi zirtirna chungchangah larsap chuan IGNOU pro vice chancellor hnenah Mizo thalaiten Hindi tawng thiam an duh thu leh an dodal loh thu a hrilh a. Mizo thalaite chu mi themthiam tak tak leh thiamthil nei an nih avangin IGNOU kaltlanga skill leh Hindi an thiamkawp chuan, pawnlama hna zawn chungchangah pawh an hlawkpui ngei a ring tih a sawi a ni.
Indira Gandhi National Open University chuan Ningani khan Aizawl, Jodhpur, Rajkot leh Thiruvananthapuram-a an Regional Centre building thar an hawng a. Inbiak hmuh theihna hmangin a rualin Union Minister of Education Dharmendra Pradhan chuan a hawng.
Aizawl Regional Centre building thar hawnna hi a hmunah IGNOU Headquarters atangin pro vice chancellor Prof Uma Kanjlal, pro vice chancellor Prof. Kiran Hazarika, Regional Services director Dr Umesh Chandra Panday leh midangten an rawn hmanpui.
IGNOU Regional Centre Aizawl hi kum 2000-ah hawn a ni a, tunah hian district zawng zawngah Learner Support Centre hawn vek niin, 2022 academic session-ah zirlai thar 7195 an nei. Kum khatah January session leh July session a awm a ni. Building thar hi kum 2021 atanga sak tan a ni.
IGNOU Aizawl Regional Centre hi kum 2009-a neih niin, an building thar sakna’n hian Rs. 106,34,12,00 sen a ni.
IGNOU hotu in larsap kawm
