Impact Study Committee on KMMTTP and Railway Link between Bairabi and Sairang chuan Nilaini khan chief minister Lalduhoma hnenah an thil zirchianna, final draft report an thehlut.
Chief minister chuan, thla 12 chhunga report thehlut tura tih an nih lai a, thla 10-ah an inpeih thei chu an thawkrim tih a chiang tih sawiin, bawhzui ngaite sawrkarin a bawhzui kawngah Study Team thawhpuina an mamawh zui zel dawn tih a lo hrilh.
An report – Situational Analysis and Field Study sawiho zui a ni a. Mizoram leh Myanmar ramria insumdawn tawnna kal dan leh kal zel dan tur nia lang, Mizoram sawrkarin a lo hlawkpui ve theihnana dan anga chhiah lak kalpui dan tur leh Mizoram tharchhuah ram danga hlawk zawka thawn chhuah dan tur an sawi a. Tunah pawh Mizorama sumdawngte leh lirtheia eizawng (logistic service) ten an hlawkpui hle a, Mizo sumdawngte hian Zakhai tawng emaw Kawl tawng emaw an hman theih phei chuan tun aiin an hlawkpui lehzual ngei dawn tih an sawi. Khawtlang himna leh dan zawm kawngah mipui inzirtir uar a tul hle tih an sawi bawk.
KMMTTP hi kum 2027-a hawn a nih dawn chuan chak taka hmalakna tur a tam hle niin an ngai a. Tuna Zochachhuah leh Salachhuaha sumdawngten an mamawh an sawi tam ber chu kudam a ni. Zokhawthar lam amite sawi langsar ber chu Indo- Myanmar -Thailand Corridor tihhlawhtlin a ni tih an sawi.
Mizoramin rel service a neih hnua a nghawng (impact) an zirnaah inner line permit tha taka kenkawh tul an ti a. Rel kawngin a paltlang khuaten hlawk zawka rel an chhawr theihnan rel station tin approach road tha neih tul an ti. Sairang leh Aizawl inkar taxi chuan man to lutuk avangin mi tam takin rel an chhawr tangkai tawk lo tih pawh an sawi a ni.
Study Committee hian Arunachal Pradesh, Nagaland leh West Bengal an tlawh a. Nagaland an kalnaah hian, relin thla reilote Mizoram a tlawh hnua state sawrkarin Impact Study Team din nachang a hria chu entawntlak an tih thu an lo hrilh a ni.
Study Committee hi an chairman T Lalhlimpuia, MLA chuan a hoa, member secretary Zomuana leh member dangte an tel. An report kimchang hi a buin an siam a, an zirchianna tinah rawtna an siam zel a, a taka bawhzui kawngah pawh sawrkar an thawhpui zui zel dawn a ni.
Impact Study Committee-in report thehluh
