Imran Khan chu chu thla rei lo te chhungin tum hnihna atana manin a awm mek a, tun tumah erawh thil a danglam hle tawh a. Eng nge thleng zel dawn tih chu ngaihven hlawh ber a ni.
9 May khan manin a awm tawh a, mahse, chhuah zalen nghal niin tuna 5 August-a man erawh danglam hlea ngaih a ni.
Man a nih hmasak khan Peshawar atanga Karachi thlengin lungawilohna lantir niin building te hal niin army te chuan kawtthler an tuam a ngaih phah a. August 5-a man a nihah erawh engmah thil danglam thleng a awm ta lo.
Khan hi lung inah a tang mek a, kum thum lai PM a nih laia state gift hralh atanga sum a hmuh te sawi lang lova puha thiamloh chantira tang tura tih mek a ni.
Lung in tang tura tih a nih avang hian Pakistan-in inthlanpui a hmachhawn turah pawh a chuh ve thei dawn lo bawk a.
Khan chuan amah thlawptute chu lungawilohna tharumthawhna tel lova lantir tura ngenin an chenna ina thu mai mai lo tura a ngenna chuan tunah rih chuan awmzia a nei pha miah lo bawk a. Eng vang nge ni ang?
Chu zawhna chu sorkar minister te zawh ni se chuan a chhan chu mipuite chuan Imran Khan leh a party PTI te chu tharumthawhna nena inzawmna nei an nih thin avangin an zui duh tawh lo an ti ang. Mahse, chu chu Khan thlawptute atanga message chhuak nen chuan a inmil lo thung.
Imran Khan leh Pakistan a establishment- Pakistan a thiltithei turu military leh intelligence agency te inlaichinna chu kum khat chuang chhe em em tawh sa zawk a ni.
Khan hi prime minister a nih khan chung ‘powerful establishment’ sipai leh intelligence te puihna avanga ni theia ngaih a ni a, mahse, an inkar a chhe ta tial tial a ni.
Imran Khan hian office atanga paihthlak a nih hnuah inthlan neih leh hun tur ngawi renga nghak mai lovin army leadership te chu a bei ta vak mai a ni. May thlaa Imran khan man a nih hnua Army headquarter mipui tena an beih phah hnuah military te chuan chung thila mawhphurtute lakah chuan zahngaihna an neih loh turzia an lantir zui a.
Army-te chuan chung mite vaihmain hna a kalpui zui a, Imran Khan party chu an tite kawk thei tia sawi a ni a, hruaitu lawkte manin tam takin Imran khan an chhuahsan zui phah a, mi sang chuang man niin chung mite chu military court-ah an chungthu ngaihtuah a ni dawn bawk a. Human rights group tena an sawisel chungin awmzia a nei hauh lo.
May thla chawhnu lam atang khan TV station neitute chu sipaite nen inhmuin khata tang khan journalist te chu Imran Khan hming lam leh a thlalak pholan pawh khapsak an ni tawh bawk.
Chu mai bakah PTI emaw an leader chanchin social media-a post te pawh tihtawp zui niin Imran Khana public broadcast te pawh an en zui tawh lo va, a chhan ber pawh sipaite an hlauh vang a ni.
Pakistan army te chuan Imran Khan thlawptu apiangte chu vaihma vek maiin Lahore-a Khan chenna pawna pungkhawmte pawh buaina an siam lo chung pawhin police ten an man tho tia sawi a ni bawk a. “Police leh armyte chetdan turu tak chuan Khan thlawptute hlauhlawpin a siam a ni,” tiin Michael Kugelman, director of the South Asia Institute, Wilson Center think tank, Washington chuan a sawi a.
“Khan thlawptute chuan 9 May a amah langsar taka an thlawpna ang kha an lantir ngam tawh lo,” tiin a sawi bawk a. Hetih lai hian Imran Khan legal team te chuan lung ina khung a nih loh nan theihtawpa beihlet an tum thu an sawi thung.
Engtiangin nge thil a kal zel dawn hriat a ni lo va. Imran khan hi Pakistani leader hlui court thubuai nei zui ta – Nawaz Sharif, Benazir Bhutto leh military dictator Pervez Musharraf te ang tho a ni a. Khan hian thuneihna a chan laiin a political rival te pawh lung inah a khung tho bawk.
Pakistan politician te chuan justice system chu politics thila anmahni tihchhiat nana hman an ti a, chutih rualin an elpui ber te hrem nan erawh hman an remti zel tho thung.
Imran Khan hi public office luah thei lo tura siam a nih zel chuan a party chunga thil thleng tur a hriatchian theih loha ngaih a ni a. Amah Khan ber a awm lo a nih chuan PTI chuan rawih lam bak a pan dawn lo tih ngaihdan a awm mek bawk a.
PTI party chu Imran Khan behchhan liau liaua siam leh din a ni a, a logo pawh criket bat niin hei hi Imran Khan cricketer hlui a nihna zawrhna anga ngaih a ni.
Khan-a party-a rinrawl ber ber te chuan party an chhuahsan tawh emaw an biru bo mek bawk a, hei vang hian inthlan pawh awm dawn se tha taka campaign kalpui ngaihna a awm lova ngaih a ni. Hei vang hian Imran Khan ber chu lung ina khunga a awm zui reng a nih chaun PTI chuan inthlanah chakna chan ngaihna a awm dawn reng reng lo va ngaih a ni a, chu chu Army te duhdan a ni chiah bawk thei tih a ni bawk.
Imran Khan politics hma lam hun thim?
