Aizawl khawpui chhunga tunhnaia in rawk leh thil bo hrang hrang police-ten an chhuizuinaah hetianga inhnamhnawih mi pahnih an man.
Aizawl Police Station huamchhunga rukruk leh in rawk chhuina kalzelah April 11 khan Vohbik Malsawmdawngzela (23) Darlung, tuna Zemabawka khawsa nia inchhal chu man a ni a. Kumin March 27 khan in rawk chungchanga rinhlelh thuah Malsawmdawngkima (33) Bawngkawn Aizawl inti chu man a ni bawk.
Vohbik Malsawmdawngzela hi a inpuanna atanga a lan danin, Electric Venga in pakhat, Tuikhuahtlanga in pakhat, Bawngkawn Upper Venglaia in pakhat, Zemabawk Middle School Venga in pakhat, Falkland Venga in pakhat, Chite Venga in pakhat, Thakthing Venga in pakhat chu tunhnaiah a rawk niin a inpuang a. Tum khata a lak zingah cheng nuai 5 leh nuai 3.4 a tel a, rangkachak thi leh bengbeh bakah thildang lak a nei nual. Cheng nuai 5 a ruk hmang hian bike a lei a, a hralh leh hman bawk a, hmuh let tuma buaipui zui a ni.
A inpuanna atangin foreign pawisa note leh India pawisa thir engemawzat an ina a chheprelh chu hmuhchhuah a ni a, heng pawisa hi Kulikawn leh Laipuitlanga in a rawk atanga a lak niin a sawi. Heng pawisa bo chungchangah hian police hnena report a awm loh avangin a hmunhma enfiah tura hma lak mek a ni tih an sawi.
Police-ten rukruk avanga an man pakhat zawk Malsawmdawngkima hi MINECO Khatla chhehvela in rawkna hrang hrangah inhnamhnawih nia sawi a ni a. Mizoram chief election officer Madhup Vyas quarter, MINECO atanga thirsakawr (Firefox bicycle) rukchhuah leh School Education addl secretary Prasana Acharya quarter MINECO atanga tool box bo chu ama lak niin a sawi a. Thirsakawr hi a thar Rs. 30000 nia sawi a ni a, a ruk tuk hian kawnga a hmuh remchan hnenah Rs.1800 in a hralh niin a sawi. Khatla South a SP Aizawl quarter bula dawr a rawk bawk a, dawr bungrua engemawzat la in a hralh chhawng leh nia sawi a ni bawk.
In rawk ching pahnih man
